Santu ‘Èngiu, Turri e Biddanoafranca, sas biddas de su tzaferanu

Sunt 45 sos ètaros de terrinu interessadu in sas cussòrgias de Santu ‘Èngiu, Turri e Biddanoafranca
9 Cabudanni 2022
in sa mesa

In sa Mesa - Est oramai una realidade s’unione de tres Comunos de su Campidanu de mesu, est a nàrrere Santu ‘Èngiu, Turri e Biddanoafranca, chi dae carchi annu ant disinnadu de si ghetare a pare movende dae una prenda de su logu issoro pro castiare mègius a su tempus benidore. Sas tres biddas sunt sas chi, in cussos sartos, ponent sas alas a sos briones de un’ispètzia prus chi non pretziosa: su tzaferanu. E cun resone. Ca su triàngulu de sas biddas mentovadas rapresentat su tretu cun sas prus manna produtzione in totu s’istadu italianu e ca est unu intre sos pagos logos de coltivatzione in otzidente.

Cada annu in atòngiu, a comintzos de sa prima metade de onniasantu, sas tres comunidades si ànimant movende dae s’incùngia e sighende·bi·la ammaniende su produtu. E in cussu perìodu de s’annu sos prados mesucampidanesos de cussos tretos si mustrant a sos bisitadores che a una pintura frorida. Gasi etotu sos presentes podent pigare parte a sa regorta e a sa limpiadura tastende finamentas sos màndigos locales aromatizados cun su tzaferanu.

Duncas, cunforma a sos òbligos de su disciplinare DOP, Santu ‘Èngiu, Turri e Biddanoafranca ant disinnadu de cumpartzire sas resursas e sas punnas pro chi, dae una produtzione agrìcula tìpica, b’apat unu resurtu econòmicu e turìsticu pro su benèssere comunitàriu de sa zona. Naschet gasi su progetu de promotzione “Le strade sello zafferano” cun tareas de ideatzione e de coordinamentu intregadas a su consòrtziu turìsticu “Sa Corona Arrùbia” chi, cada annu, aprontat sa manifestatzione omònima articulada in momentos diferentes pro chi cadaunu de sos tres Comunos, de sas comunidades e de sas realidades produtivas diant e retzant sa lughe giusta.

Sa coltura de su tzaferanu in sas biddas de Santu ‘Èngiu, Turri e Biddanoafranca est oramai una faina rodada chi in sos ùrtimos annos est faghende connòschere bisos e potentzialidades. Una faina mantesa dae unu passàgiu intergeneratzionale profetosu. A su presente sos sartos mesucampidanesos faghent brotare su bonu de sa produtzione italiana: su 60%. E sunt 45 sos ètaros de terrinu interessadu in sas cussòrgias de Santu ‘Èngiu, Turri e Biddanoafranca. Datos de ispera e de esempru.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg