S'“European Beer Star” de Mònacu de Baviera: premiada sa Birra Puddu

Est santajustesa sa “English-style Porter” mègius chi bi siat
20 Cabudanni 2022
in sa mesa

In sa Mesa - Sa birra de su birrifìtziu santajustesu "Birra Puddu" de Santa Justa est sa "English-style Porter" mègius chi bi siat. A lu decretare est istadu s'"European Beer Star" de Mònacu de Baviera, est a nàrrere s'adòbiu chi dae su 2004 est organizadu dae sos assòtzios "Private Brauereien Deutschland", "Private Brauereien Bayern" e "Association of Small and Independent Breweries of Europe".

Ma ite est s'"European Beer Star"? S'"European Beer Star" est una rassigna chi s'isbòligat ogni annu e chi at sa punna de promotzionare sa cultura de sa birra. Semus faeddande de una rassigna de importu mannu, chi registrat sa presèntzia de produtores brassìcolos chi lompent dae totu su mundu.

Sas birras chi leant parte a s'"European Beer Star" benint giuigadas dae una giuria internatzionale de espertos de birra, chi tra sos critèrios de avaloramentu ant massimamente sa presentatzione, su nuscu e su sabore. No est totu, pro ite sas birras devent satisfàghere critèrios dislindados, tra custos bi sunt: su colore suo, s'èssere tròvula, s'ispuma, s'istrutura, su sabore de su malto e su sabore de su lùpulu.

In prus de su birrifìtziu de Sardigna "Birra Puddu", tra sos chi ant leadu prèmios bi sunt finas unu nùmeru mannu de aziendas tedescas, belgas e italianas. De ogni manera, ant otentu resèssida manna peri sos mastros birràios lòmpidos dae: Istados Unidos, Tzina, Giapone, Brasile e Cànada.

Duncas, su birrifìtziu "Birra Puddu" est lòmpida a Mònacu de Baviera e su 14 de su mese de cabudanni coladu at bàtidu in Sardigna su primu postu in sa categoria "English-style Porter".

Sa "Porter", acrarit un'ischeda chi s'agatat in su giassu internet de su birrifìtziu "Birra Puddu", est una "birra robusta chi s'otenet dae maltos iscuros e chi ant gradu alcòlicu mesanu". Sa “Porter” est una birra "forte, carca e aromata, una birra chi at un'echilìbriu perfetu tra su durche e su marigosu".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg