Su “Festival delle Peschiere”: in programma dae su 28 de cabudanni e s'1 de santugaine

Sa sustenibilidade e sos màndigos chi valorizant su territòriu
19 Cabudanni 2022
in sa mesa

In sa Mesa - L'ant denumenadu "Festival delle peschiere" e est una manifestatzione meda importante chi at unu tema de interessu mannu: sa sustenibilidade.

Su "Festival delle peschiere" no at a èssere feti un'atopu dedicadu a sa sustenibilidade ambientale, ma at a pertocare peri a sa sustenibilidade chi interessat prus serente a sa rubrica nostra, est a nàrrere su sustenibilidade de sos produtos de s'ambiente chi a pustis de unu protzessu de trasformatzione agatamus in su pratu comente màndigu. Pro cantu pertocat a su "Festival delle peschiere", de seguru su produtu de custa trasformatzione est su de su mare, ma finas de s'istagnu e de sa laguna. E difatis, sas pescheras chi ant a acasagiare custa manifestatzione culturale s'agatant in sa provintzia de Aristanis. Pro èssere prus pretzisos depimus sutalineare ca custu festival interessat sas pescheras de Marceddì (Terraba), de Crabas e de Santa Justa e ca sa manifestatzione s'at a isboligare in bator dies, est a nàrrere su 28, su 29, su 30 de su mese de cabudanni e sa primu die de su mese de santugaine.

Sas bator dies sunt organizadas dae "Lega Coop Sardegna" e finas dae sos organizadores de su "Festival Dromos", manifestatzione de mùsica famada meda in s'ìsula nostra e massimamente in sa provìntzia de Aristanis. Sos atopos sunt aprontados cun s'agiudu de Cru Unipol e ant su patrotzìniu de s'ASviS.

Sa manifestatzione at a èssere rica meda. In programma, difatis, bi sunt: atopos cun espertos, mustras de libros supra su tema de su "Festival" etotu, dibàtidos. Sempermai non podent mancare sos momentos dedicados a sos màndigos de calidade. Ant a èssere momentos gastronòmicos chi previdint unos cantos tastos. Tocat a sutalineare, però, ca custos tastos sunt aprontados pro valorizare sos produtos gastronòmicos locales e massimamente s'ambiente chi lu produit.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg