Cantidade e calidade otimales pro sos binos sardos de ocannu

Nant sos de Assoenologi, Ismea e Uiv chi non ddoe at variedade de àghina cun calidade chi non siat otimale
7 Ladàminis 2022
in sa mesa

In sa Mesa - Cantidade e calidade sunt s’alfa e s’omega de una binnenna, sa de ocannu, chi at a èssere arregordada pro tempus meda in Sardigna.

Faeddant is pertzentuales, cun unu 15% in prus de produtzione, e sa punna de una classificatzione otimale. Is cajones? Unas cantu de màdrighe meteorològica: su primu semestre, difatis, pagu at pròidu (sceti is meses de martzu e abrile fiant in sa mèdia in contu de pretzipitatziones) e, bona sorte pro sos sartos nostros, chilighia pagu e nudda. Belle su pròpiu su mese de maju, cun sas àeras iscutinende abba abellu abellu e, apustis, cun chidas e chidas colende cun carchi nue ebbia finas a sa segunda dècade de austu.

Un’istiu bastante sicu, duncas. Ma chi, mancu male, no at ingendradu dannu a sos fundos e a sas bìngias, ambos amparados dae sas riservas ìdricas postas a banda asuta terra gràtzias a sas profetosas pròidas de s’atòngiu innantis.

Positivu fintzas s’istadu fitosanitàriu de sas prantas pro more de sas temperaduras artas pagu dèghidas pro sas pestas nieddas de sas bides (peronòspera e oìdiu). Nant sos de Assoenologi, Ismea e Uiv, cun pàrreres espressados apustis de sas chircas insoro, chi non ddoe at variedade de àghina cun calidade chi non siat otimale. In rassigna Muscadu, Chardonnay, Sauvignon, Nascu, Malvasia, Nuragus, Trobadu e Vermentinu. Àghina arba sana, duncas, cun echilìbriu deghile intra àtzidos e tzùcaros e cun una intensidade aromàtica prus chi non bona e meda mègius de sa de s’annu coladu. Bene su matessi pro is pibiones rujos, semper in contu calidade, istadu sanitàriu e cantidade: Cannonau, Carignanu, Mònica, Cagnulari e Nieddera lompent a tzilleris e domos cun totu sas caraterìsticas insoro.

Is previsiones sunt bonas: cun 500mila etòlitros o barda de mustu e de binu sa produtzione sarda est meda prus manna de su 2021.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg