Casteddu inchìngiat "Sant'Elia food festival"

Dae su 13 a su 16 de su mese de làdamine in su "Lazzaretto" s'at a faeddare de sos màndigos in relata a sos temas chi pro su prus influentzant sa vida nostra
11 Ladàminis 2022
in sa mesa

In sa Mesa - Casteddu inchìngiat "Sant'Elia food festival", sa primu editzione de sa manifestatzione chi s'at a isboligare dae su 13 a su 16 de su mese de làdamine.

Cun "Sant'Elia food festival" in su "Lazzaretto" de Casteddu s'at a faeddare de su ruolu de sos màndigos in relata a sos temas chi pro su prus influentzant sa vida nostra. Semus faeddande de temas chi pertocant a sa salude de s'òmine e de su pianeta, a sa sustenibilidade ambientale e a s'isvilupu econòmicu e sotziale, e finas a su ruolu de su màndigu comente patrimòniu immateriale.

Sas atividades programmadas pro sas dies de su "Sant'Elia food festival" sunt unas cantas e totus interessantes. "Show-cooking", letziones, addòbios, murales e pràngios comunitàrios ant a èssere discansados dae unu programma ricu de cunferèntzias e de apuntamentos chi at comente tema su màndigu, chi est unu mèdiu chi faghet nàschere relatziones, esperièntzias e cultura, e peri istrumentu pro favorèssere sa liberatzione, sa cura, sa solidariedade e s'isvilupu de sas comunidades.

Interessados "in primis" sos chi bivent in Sant'Elia, chi ant a àere s'oportunidade de coghinare sas retzetas issoro paris cun s'"Accademia del buon gusto" e cun sos "chef" William Pitzalis (agiudadu dae Joe Perrino), Pier Paolo Argiolu "In Cucina con Cozzina", Daniele Cui, Marcello Putzu, Giuseppe Falanga e Maria Carta.
Cando sos mannos sunt coghinende, sos giòvanos paris cun "Manu Invisible", "Retro" e "Esp" ant a pònnere in òpera unu murale mannu meda.

No est totu, pro ite in su "Sant'Elia food festival" b'at a èssere logu finas pro su "Cinéma du Désert", cun sa projetzione de su film "Domani", de su film "Ratatouille" e de su film "Antropocene".

Su Festival at a èssere presentadu dae Elena Marconi, ideadora e coordinadora de sa manifestatzione paris cun s'artista Gerardo Ferrara.

Su "Sant'Elia food festival" est istadu pesadu cun s'agiudu de sa "Fondazione di Sardegna", de sa Fondazione CESVI(acrònimu de "Cooperazione e Sviluppo"), de sa Banca Intesa San Paolo e de sa "Fondazione Carlo Enrico Giulini".

Sa manifestatzione casteddaja at a abèrrere sas ghennas suas dae mangianu fintzas a s'ora chena. Totus sas atividades sunt a indonu, ma pro leare parte a sos apuntamentos in programma tocat a prenotare in antis.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg