In Seddori torrat “Cantine aperte in vendemmia”

S'addòbiu est promotzionadu dae su “Movimento turismo del vino” e est organizadu dae sa “Cantina Su’entu”
5 Ladàminis 2022
in sa mesa

In sa Mesa - Su 9 de su mese de ledàmine in Seddori torrat "Cantine aperte in vendemmia", s'addòbiu chi afestat a sa serrada de sa binnenna. S'apuntamentu, lòmpidu a sa de sete editziones, est promotzionadu dae su "Movimento turismo del vino" e est organizadu dae "Cantina Su'entu".

Sa manifestatzione
dedicada a su binu at a incumentzare a sas 11.00 e at a permìtere a sos chi ant a leare parte a sa "festa" de iscobèrrere su mundu de sa cantina; l'at a fàghere pro mèdiu de sos "tour" ghiados. "Cantine aperte in vendemmia" at finas a dare a sos bisitadores sa possibilidade de bisitare s'espositzione de sas màchinas e de sos trastos impreados in bìngia.

Dae sas 12.00 a sas 18.00 "Cantine aperte in vendemmia" at a abèrrere sas ghennas suas a sos màndigos, ma tocat a pretzisare ca l'at a fàghere cun sos mastros de pitza mègius de Sardigna, est a nàrrere cun sos mastros de pitza premiados cun sos "Tre spicchi" dae su "Gambero Rosso". Faeddamus de mastros chi ant otentu reconnoschimentos dae sa "50 Top pizza". Sunt sa pitzeria "Bosco" de Tèmpiu, sa "Re|Mi" de Tàtari e sa "Framento" de Casteddu. Sas pitzas ant a èssere acumpangiadas dae sos gelados fatos cun sa figu morisca e cun su Muristellu, durches ammaniados dae sos mastros de geladu Maurizia e Fabrizio Fenu de "I Fenu" de Casteddu.

No est totu, pro ite a sas 12.00 e posca a sas 15.00, s'enòlogu e agrònomu Gianluca Ventroni at a ghiare sos bisitadores in "E tu sei pronto a prenzare? La pressatura dell'uva".

A sas 12.30 est prevìdida sa presentatzione de su libru de su mastru de fotografia Gianni Rizzotti: "Oru Nostru, La mia Sardegna", 199 fotografias chi nos contant sa Sardigna pro mèdiu de sos logos suos e de sos protagonistas suos.

A sas 15.00 s'at a isboligare "Su'entu for Kids", addòbiu dedicadu a sos minoreddos. Semper a sas 15:00, paris cun su giornalista Giuseppe Carrus de su "Gambero Rosso" e de sa "somelier" Ais Amalia Menneas, s'at a isboligare su tastu ghiadu "Pizza e Vino, alla ricerca dell'abbinamento perfetto".

A incumentzare dae sas 15.30 "Cantine aperte in vendemmia" at a èssere allegrada dae notas “swing” chi ant a acumpangiare sa "Social dance" a incuru de su "Cagliari Lindy Circus". In fines, a sas 17.00 s'at a afestare a sa serrada de sa binnenna paris cun su "live" de sos "Skaosss".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg