Su tonforanu protagonista de su “Festival Strade dello Zafferano di Sardegna DOP”

Sa festa est in programma su 6, su 13 e su 20 de onniasantu
31 Ladàminis 2022
in sa mesa

In sa Mesa - In programma dae domìniga 6 a domìniga 20 de su mese de onniasantu sa manifestatzione “Strade dello Zafferano di Sardegna DOP”, chi torrat a pònnere paris sas mègius realidades agrìculas chi produint tonforanu in Sardigna. Sempermai, semus faeddande de sa retza de sas comunas de Turri, de Santu Èngiu e de Biddanoa Franca.

Sas biddas chi produint s'“oro ruju” de Sardigna, difatis, ant a èssere sas protagonistas de sas tres domìnigas de festa: su 6, su 13 e su 20 chi ant a bènnere.

Sa manifestatzione, chi at s'amparu de sa “Fondazione Sardegna” e de s'Assessoradu de sa Cultura de sa Regione Autònoma de Sardigna e est ghiada dae s'”Associazione Enti Locali”, previdit unu programma chi s'at a partzire in tres atopos: su de domìniga 6 est organizadu in Santu Èngiu, su de su 13 est in programma in Turri e s'apuntamentu de su 20 est previdìdu in Biddanoa Franca.

Sa festa de su tonforanu – si leghet in sa nota de imprenta imbiada dae sos organizadores de “Festival Strade dello Zafferano di Sardegna DOP” a sos giornales - at a èssere un'ocasione de iscoberta de sos produtos de su territòriu e finas de sas bellesas chi s'agatant in sas tres biddas de su Campidanu de Mesu.

Ma non est totu, pro ite sos organizadores ant peri afirmadu ca sas tres comunas de sa retza ant una punna: sa de fàghere intrare su “Festival Strade dello Zafferano di Sardegna DOP” in su catàlogu de sas manifestatziones prus importantes de sa Regione Autònoma de Sardigna. “Sa retza at s'obietivu de valorizare su produtu locale e de lu fàghere a sa manera mègius”. Est cantu at declaradu sa Vitze-Sindiga de Turri e Assessora a sas Polìticas Sotziales Ilaria Casula.

Tocat finas a pretzisare ca custa valorizatzione pertocat a totu sa comunidade de su territòriu de sas comunas, pro ite at a batire a domo unos cantos vantàgios sotziales e massimamente unos cantos vantàgios econòmicos.

A pustis de duos annos de firmu cajonadu dae s'emergèntzia de su covid-19, duncas, su “Festival Strade dello Zafferano di Sardegna DOP” editzione 2022 torrat e at a fàghere chistionare de sei.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg