In Bidd'e Sorris torrat sa "Festa del carciofo"

Tres dies in ue sa protagonista at a èssere s'iscartzofa
24 Onniasantu 2022
in sa mesa

In sa Mesa - Tres dies de festa in Campidanu, tres dies chi ant a àere comente protagonista s'iscartzofa: sunt su 25, su 26 e su 27 de su mese de santandria de su 2022. In Bidd'e Sorris at a torrare, difatis, sa "Festa del carciofo" e at a lòmpere a sa de chimbe editziones.

A indanimare s'addòbiu, firmu a pustis de duos annos de Covid-19, b'ant a èssere tastos, laboratòrios, mustras, passigiadas in sos caminos de sa terra crua e meda àteru.

Cun sa "Festa del carciofo", in Bidd'e Sorris su 26 e su 27 de su mese de santandria at a torrare finas "Portali Aperti". Sa bidda at a abèrrere a sos bisitadores sas domos tìpicas suas, est a nàrrere sos fàbbricos campidanesos fatos in terra crua. Sas domos campidanesas ant a acasagiare camineras sesoriales, laboratòrios de sabores e unu nùmeru mannu de mustras.

Sa "Festa del carciofo" s'at a isboligare in su coro de sa bidda, su tzentru istòricu. Tzentru de sa manifestatzione at a èssere pratza Brundu, un'àrea a inghìriu de sa crèsia de Sant'Antiogu e de s'ex cunventu de sos Caputzinos, in intro de sas domos campidanesas Domo Medda e Domo Podda.

Su programma de sa "Festa del Carciofo" est ricu meda e tra sos addòbios prus interessantes b'at a èssere su pràngiu in unas cantas firmadas de ristoro. Protagonista de su menu, mancu a lu nàrrere: s'iscartzofa.

Sa "Festa del carciofo" at a abèrrere sas ghennas chenàbura 25 de su mese de santandria a sas 10.00 cun sos laboratòrios aprontados pro sa manifestatzione e cun su progetu "Orto e mercato" a incuru de "Donne Impresa Campagna Amica Coldiretti". Dae sas 17.30 sa Sala cungressos de sa "Cooperativa ortofrutticola di Villasor" at a acasagiare su cunvegnu "Opportunità e prospettive del distretto rurale Campidano. Sostenibilità e territorio". Ant a leare parte a cust'addòbiu sos rapresentantes de s'Assessoradu de s'Agricultura e Reforma Agropastorale de sa Regione Autònoma de Sardigna, sos de s'"Agenzia Laore Sardegna", sos rapresentantes de su "GAL Campidano" e de su "Slow Food Sardegna".

Sa manifestatzione at a sighire sabàdu 26 a sas 9.00 cun laboratòrios, màndigos, mustras, mùsica e cun sa bisita a su casteddu de Siviller.

Sa"Festa del Carciofo" de Bidd'e Sorris at a cungiare sa ghenna sua domìniga 27. S'ùrtima die de s'addòbiu at a àere in programma: su "Quinto trofeo CarcioBike di Villasor", sa "Passeggiata nei carciofeti", sa mùsica de sas launeddas, unos cantos tastos de durches tìpicos, unu "Showcooking" cun su "chef" Cotzina e su "CarcioFood".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg