Noragùgume at su de tres postos pro casu de berbeghe mègius de su mundu

Binchidora s'azienda "Otto Passi" ghiada dae Rita e Luca Tolu paris cun Paolo Musu
9 Onniasantu 2022
in sa mesa

In sa Mesa - Noragùgume at otentu su de tres postos pro su casu de berbeghe mègius de su mundu. A batire a domo su reconnoschimentu est s'azienda "Otto Passi" ghiada dae tres giòvanos sardos: Rita e Luca Tolu paris cun Paolo Musu.

Sa gara
chi at bidu su "Pecorino superiore 180 giorni" lòmpere a su de tres postos est su campionadu mundiale "World cheese award 2023", chi s'est isboligadu in sa tzitade de Newport, in Galles. Tra sos tipos de casu de primore, su casu berbeghinu fatu dae sa sarda "Otto Passi", realidade produtiva chi est amministrada dae Rita Tolu, dae su frade Luca e dae su maridu Paolo Musu, est una conchista importante pro totu sa Sardigna. Faeddamus de tres persones cun ruolos diversos, chi paris ghiant s'azienda agrìcula de famìlia "Radicas", una realidade produtiva pesada dae Michele Tolu, est a nàrrere su babbu de Rita e Luca.
 

Su casifìtziu ghiadu dae Rita, Luca e Michele oe faghet parte de su progetu "Valides", coordinadu dae s'"Agenzia regionale Agris". Unu progetu chi pertocat a sa caraterizatzione e a sa tutela de sa biodiversidade microbica de sas matèrias primàrgias traballadas.

A premiare su casu berbeghinu sardu (fatu feti cun late cruu e càgiu de angione, sena tratamentos tèrmicos e màdrighes liofilizadas) sunt istados duos ingredientes: su traballu fatu cun amore e sa professionalidade manna de sos tres giòvanos. Ingredientes de una retzeta chi non podet faddire e chi at otentu unu resurtadu estremadu pro unu produtu de primore chi at àpidu unu reconnoschimentu mundiale de importu mannu, in intro de unu "contest" chi at bidu in gara sos produtores de casu mègius de su mundu. Faeddamus siat de su casu fatu dae sos artesanos siat de su casu fatu dae sas impresas.

Casajos, bendidores, clientes e tastadores ant giuigadu in Galles 4.453 tipos de casu lòmpidos dae 42 Paisos, cumpartidos in 98 categorias. Gràtzias a su "World cheese award 2023" su "Pecorino superiore 180 giorni", casu berbeghinu de Noragùgume, at conchistadu sa medàllia de brunzu comente casu berbeghinu mègius de su mundu in sa categoria "Pecorino".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg