“Pecorino Romano DOP”: oto milliones pro afortigare sa promotzione internatzionale

In sa Mesa - S'Unione Europea dat oto milliones a su "Consorzio di Tutela del Pecorino Romano DOP", chi in sos tres annos imbenientes at a fàghere duos progetos importantes pro promotzionare e afortigare su "Pecorino Romano DOP" in sos mercados internatzionales, e massimamente in sos mercados de sos Istados Unidos, de Gran Bretagna e de Isvìtzera.

Sos duos progetos finantziados dae s'UE ant a tzucare dae su 2023 pro s'80%. In su mese de martzu 2023 in sos Istados Unidos at a èssere incaminadu su progetu "PR ON TOP", una filera de atividades chi incluit sa partetzipatzione a sas fieras alimentares prus importantes. Tra custas: sa "Summer Fancy Food" de New York e sa "Winter Fancy Food" de Las Vegas. Protagonista de unu nùmeru mannu de addòbios, su "Pecorino Romano DOP" at sa punna de fàghere crèschere su nùmeru giai mannu de consumadores americanos.

In Gran Bretagna e in Isvìtzera, imbetzes, su "Pecorino Romano DOP", paris a su "Consorzio dei Vini Alto Adige" a su "Consorzio Vini dell'Etna", at a dare vida a su progetu "TASK EU".

Su "Consorzio di Tutela del Pecorino Romano DOP", duncas, sighit cun sa polìtica de promotzione incumentzada in su 2021, e lu faghet cun duos progetos importantes, comente at sutalineadu a s'Ansa su Presidente de su Cunsòrtziu Gianni Maoddi. Su Presidente at pretzisadu ca "s'atividade de promotzione est netzessària pro sighire a fàghere crèschere unu produtu de fundamentu e duncas pro sighire a ismanniare sa fama de unu produtu connòschidu e apretziadu e pro lu propònnere in sas mesas de sos consumadores istrangios". E galu est netzessària " pro afortigare sos raportos cun sas retzas cummertziales a avantàgiu de s'economia sarda e de su cumpartu". S'atividade de promotzione isboligada dae su Cunsòrtziu – at sutalineadu Maoddi - est òpera de su traballu "de totus sos sòtzios de su Cunsòrtziu, chi ant dadu s'aprovatzione issoro a fàghere crèschere sa contributzione pro chilu de produtu".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22