Sa Sardigna est sa reina de sos “savoiardi”

Pro su “Gambero Rosso” s'ìsula at sos pistocheddos mègius de Itàlia
17 Onniasantu 2022
in sa mesa

In sa Mesa – Sa Sardigna est sa reina de sos pistocheddos (“savoiardi”). A lu nàrrere est sa classìfica “Gambero Rosso”, fata in subra de sos “migliori 7 savoriardi italiani”. In sa classìfica de sa domo editora romana s'ìsula est sa binchidora. Binchet, difatis, pro nùmeru prus artu de aziendas isseberadas: tra sos 7 nùmenes chi ant otentu su reconnoschimentu 4 sunt sardos.

Ma ite sunt sos “savoiardi”? E comente sunt fatos? Sos “savoiardi” sunt sos pistocheddos de cafè. Custos pistocheddos si distinghent dae sos àteros pistocos pro ite sunt lèbios e sèmplitzes e ant sa forma de unu didu mannu truncheddutzu e grussu, cun sa cara pàllida e incarcada e prena de tzùcaru. Sos “savoiardi” sunt fatos cun tres ingredientes feti: farra, tzùcaru e oos meda.

Ladyfingers” pro sos inglesos, “biscuit à la cuillère” pro sos frantzesos, e “savoiardi” pro sos italianos, chi nde colligant su nùmene a sas orìgines suas, est a nàrrere a sa regione “Savoia”, est a nàrrere sa regione insertada tra Frantza, Itàlia e Isvìtzera, chi est su logu in ue sunt nàschidos sos pistocheddos. Sos “savoiardi” sunt istados imbentados in sa corte de Amedeo VI, forsis dae su coghineri de su Conte Verde in onore de una visita de su re de Frantza. Dae inoghe est incumentzada sa difusione issoro in totus sas terras chi s'agantànt a suta de su poderiu de sos Savoia: su Piemonte, ma massimamente sa Sardigna (in ue sos “savoiardi” sunt lamados pistocheddos), chi prima de s'unidade de Itàlia est istada colonitzada dae sos Savoia.

Sos pistocheddos sardos sunt durches primorosos e fatos sighende sa retzeta traditzionale. No est pro nudda ca in sa classìfica fata dae “Gambero Rosso” pròpiu sa Sardigna batit a domo bator postos. Gosi ca su primu postu in classìfica est ocupadu dae sos pistocchedos fatos dae s'azienda “Esca Dolciaria” de Durgali. Batit a domo su de duos postos, cun su marcu “Anna P.”, s'azienda “Lanaittu” de Ulìana. A su de tres postos b'est s'azienda de Fonne “SavoSardo di Giovanni Moro”, a su de bator s'agatat s'azienda “Tipico”, semper de Fonne. Totus sas aziendas sunt in provìntzia de Nùgoro.

Sos àteros tres postos in classìfica sunt ocupados dae realidades produtivas italianas, est a nàrrere: dae s'azienda “Di Ciaccio Specialità Dolciarie” de Gaeta, dae s'azienda “Matilde Vicenzi” de San Giovanni Lupatoto e dae s'azienda “Montebovi” de Carmagnola.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg