S’abbardente

Faeddemus de issa, de nostra sennora de sos distillados
11 Onniasantu 2022
in sa mesa

In sa Mesa - Su fritu paret tardende e issa, in teoria, est tando chi nche la diamus dèvere tragamus mègius a intro. Ma non b’at tempus chi nos impedat de tastare cun gosu su fragassu de aromas, peri sa buca intrea, chi petzi s’abbardente ischit inchèndere. E si diat cumbinare de atopare a caminu carchi cristianu ponende su limbicu a caddu, “si Deus cheret e sos carabineris lu permitint” comente cantat Piero Marras, beh, tando est craru chi su fogu no est su de sas caddaridas artziende·si in corpus ebbia, ma finamentas s’elementu chi, a trìbide bene assentada, ànimat su ballu finale de sas binatas.

Ma faeddemus de issa, de nostra sennora de sos distillados. Prus chi no alcòlica, in colore de abba ma cussu ebbia, issa la otenimus pro mèdiu de una distillatzione dòpia, difatis, de binu o de binata imbolende·nche sa prima e s’ùrtima brotada (chi su perìgulu de presèntzia de metanolu in s’abbardente siat sa prima cajone de sa proibitzione in chentina?). Sa binata, est a nàrrere sos resùgios de sa faghidura de su binu, est gasi chi si mudat in resursa. Su chi imbetzes si collit, su coro de su distilladu, nche cheret remunidu in carradellos o in ampullas cunforma a sos sèberos de chie la produit. E chie si la produit, ca unu contu e sa lege e unu contu est sa prassi, in prus de sa netzessidade de non nch’imbolare sa binata, lu faghet pro duas chistiones. Sa prima est crara e nòdida e deretu contada in custas pagas rias, est a nàrrere su de àere in domo unu licore forte e, difatis, inchesu, ardente. Sa segunda est pro sos impreos de s’abbardente matessi in coghina pro unas cantas retzetas.

E cando su fritu lompet a beru e si ponet sa caratza de carrasegare, cussa abbardente non de la bufare ebbia ma la tastamus finamentas mandighende sas catas longas chi essint dae s’imbudu e chi in s’istèrgiu suo fringhent pro si nche mòrrere a pustis in buca cun aterunu fragassu de aromas. E posca un’àteru tzicu. Chi giai bi deghet.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg