“Tra mare e laguna” torrat cun “Aggiungi un pesce a tavola”

Su progetu de s'“Agenzia Laore Sardegna” chi èducat a mandigare a manera sustenìbile
16 Onniasantu 2022
in sa mesa

In sa Mesa - "Tra mare e laguna" torrat cun "Aggiungi un pesce a tavola", su progetu de s'"Agenzia Laore Sardegna" chi èducat a mandigare a manera sustenìbile.

Ma de ite semus faeddande cando mentovamus "Aggiungi un pesce a tavola"? Sèmplitze: semus faeddande de su progetu de educatzione chi s' "Agenzia Laore Sardegna" organizat pro educare a sa gente a consumare sos produtos de su mare e sos de allevamentu a manera sustenìbile e segura. Duncas, su "leit motiv" est: mandigare cun atinamentu.

S'isseberu est tra un'aperiente in “bateu” in s'istaini de Tortolì pro mandigare ostiones e butàriga, e un'aperiente a Colostrai e Feraxi, òasi naturalìsticas de Murera. Est custu su chi previdit su "tour" esperentziale de "Aggiungi un pesce a tavola".

Su progetu est istadu finantziadu cun fundos europeos (Feamp) e s'isbòligat paris cun s'Assessoradu de s'Agricultura e Reforma Agropastorale de sa Regione Autònoma de Sardigna.

Sos protagonistas de "Aggiungi un pesce a tavola" sunt sa pischera de "San Giovanni" de Tortolì e sa pischera de Murera.

"Aggiungi un pesce a tavola" at su coro suo in paràulas comente educatzione, formatzione, connoschèntzia e at finas s'obietivu de fàghere cumprèndere a sa gente ca peri su pische de allevamentu podet èssere sanu e seguru.

"Aggiungi un pesce a tavola" interessat finas a sas iscolas e previdit una filera de campagnas de comunicatzione cun "spot" "web" e "social" de s'"Agenzia Laore Sardegna" e de sa Regione Autònoma de Sardigna. In prus, pro valorizare su pische e sos àteros produtos de mare e de allevamentu, su progetu proponet peri deghe retzetas video licantzas e nuscosas.

Su tour "Tra mare e laguna" s'est concruidu cun una firmada "gourmet" in s'"Istituto Professionale Alberghiero Janas" de Tortolì, in ue una brigada de istudiantes ghiada dae sos mastros Fabrizio Murru e Giorgio Cardia at propostu una filera de pratos licantzos fatos cun pische de su logu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg