Tra sos panetones mègius de su mundu unu est terrabesu

Est istadu "batijadu" "Sardamisù" e batit a domo sa madàllia de prata
3 Onniasantu 2022
in sa mesa

In sa Mesa - Tra sos panetones prus bonos de su mundu unu est terrabesu, si lamat "Sardamisù" e a lu fàghere est "Fromentu", sa paneteria de Terraba, sa de sos Porcedda. Unu panetone estremadu, chi in su cuncursu "Il migliore panettone del mondo 2022", organizadu dae sa FIPCG ("Federazione Internazionale Pasticceria, Gelateria e Cioccolateria"), at binchidu sa medàllia de prata in sa categoria "Panettone Innovativo".

Tocat a sutalinearre, però, ca "Fromentu" est una realidade chi s'est giai afirmada in custu cuncursu. S'annu coladu, difatis, at batidu a domo una medàllia de oro e una de brunzu.

Su "Sardamisù" de "Fromentu" cheret ammentare unu durche italianu famadu meda, est a nàrrere su "Tiramisù", ma lu faghet impitende ingredientes de Sardigna.

Sa gara s'est isboligada in una bidda de su Làtziu, Fiano Romano, e at bidu comente protagonistas 300 produtores lòmpidos dae totu su mundu.

Cale est su segretu de su "Sardamisù"? Su primu segretu, comente isvelat Porcedda, est aunire innovatzione e traditzione: "s'innovatzione - pretzisat - permitit de batire avantàgios a sa traditzione”. Duncas, pro fàghere su panetone 'Sardamisù' Porcedda at impreadu sos chi sunt sos ingredientes "sacros" de su "Tiramisù": su cafè e su zabajone fatu cun binu "Marsala", a pustis est istadu annantu su tziculate fondente, sa pabassa, sa Crannatza de Aristanis, su rum de Cuba, su mele sardu, sos rujos de s'ou de puddas pesadas in su territòriu, su burro de Arborea e su sale marinu de Sardigna. No est totu, proite tocat a aciùngere ca su "Sardamisù" est unu panetone sena de latòsiu, incapadu cun tziculate fatu cun late de avena e cun cafè sena de cafeina.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg