In Barì s'enogastronomia de "Cosa Bona & Bariesa"

In sa Mesa - Su 29 e su 30 de nadale 2022 Barì acasàgiat sa primu editzione de "Cosa Bona & Bariesa". Sa manifestatzione enogastronomica, nàschida finas gràtzias a s'amparu de sa Regione Autònoma de Sardigna, est organizada dae s'assòtziu "Quiescenza" e da sa Comuna de Barì.

Coro de s'addòbiu ogiastrinu ant a èssere sos màndigos e sas traditziones de su territòriu, patrimòniu e sìmbulu de sa cultura de Ogiastra.

Un'addòbiu de duas dies chi aunit sa traditzione de sos màndigos cun cussa de s'artesanadu. Ant a caraterizare sa manifestatzione sos colores e sos nuscos de su territòriu, sos produtos tìpicos, sos tastos, sos "show cooking" e sos laboratòrios, ma finas sa mùsica, sos ispetàculos,  sas camineras in sa natura e s'iscoberta de sos monumentos bariesos.

Tocat finas a pretzisare ca, si "Cosa Bona & Bariesa" est una festa chi torrat onore a sas traditziones bariesas, massimamente lu faghet presentande a sos bisitadores sas retzetas antigas suas.

Una manifestatzione importante, duncas, in ue sos sabores tìpicos bariesos ant a fàghere connòschere unu mundu gastronomicu licantzu, chi faghet onore a sa traditzione culinària de Sardigna.

No est totu, pro ite in "Cosa Bona & Bariesa" b'ant a èssere finas "chef" famados, comente  Giorgio Cardia, Mercedes Lilliu, Marina Loi, Clelia Bandini, Marina Ravarotto e Mauro Pischedda.

Tra màndigos e artesanadu, Barì, paris cun Gabriele Loi at a dare onore finas a su bestire traditzionale, l'at a fàghere cun s'espositzione de sos bestires sardos.
Su programma de "Cosa Bona & Bariesa" at a leare pee a sas 9.00 de su 29 de su mese de idas cun "L'ambiente che ci nutre". In su matessi oràriu s'at a isboligare finas "Bari Sardo una tela a cielo aperto", unu "tour" ghiadu pro iscobèrrere sas òperas de sa  "street art" e de sos murales de Barì.

A sas 10.00, imbetzes, in sos aposentos de s'ex munitzìpiu, s'atentzione at a èssere totu pro s'espositzione de sos bestires traditzionales e pro sa mustra fotogràfica "Bistimenta". Semper a sas 10.00 s'ant a abèrrere sos laboratòrios "Le mani in pasta".

Sos laboratòrios ant a sighire a sas 15.00 cun "Tesori d'Ogliastra". Unu laboratòriu in ue s'at pòdere imparare comente si faghent sos culurgiones, sa cocoi prena e sas cocoeddas.

Su programma sighit su 30 de nadale, die chi at a cumentzare a sas 10.00 cun su laboratòriu dedicadu a su pistocu.

S'addòbiu de sas 15.00 at a èssere dedicadu a sos "show cooking". Sa manifestatzione at a sighire a sas 18.30 in sa "Corte dei Pastori" cun  s'"Arte della pastorizia", tema de sos tastos e de sos laboratòrios chi pertocant a sas tècnicas antigas de coghidura de sa petza e a sa produtzione de su casu.  

Onni tastu de "Cosa Bona & Bariesa" at a èssere acumpangiadu dae sa mùsica e dae sa dantza de su "Gruppo folk San Giovanni" e de su "Coro di Dorgali Istelotte".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22