Chena solidale: fèminas "chef" in nùmene de Grazia Deledda

In su "Felix" de Terranoa s'ant a pòdere tastare sas retzetas mentovadas in sos romantzos de sa prèmiu Nobel de Sardigna
5 Mese de idas 2022
in sa mesa

In sa Mesa - Fèminas "chef" in nùmene de Grazia Deledda pro sa chena solidale "A Cena con Grazia", nàschida dae un'idea dae Vincenzo Palimodde, de Sa Horte de su Poeta, su ristorante in domo de Ulìana, dae sa "chef " Vitalia Scano e dae s'enogastronomo e Presidente de s'assòtziu "Stelle del Sud" Gilberto Arru. S'addòbiu s'at a isboligare in su "Felix" de Terranoa, in ue s'ant a pòdere tastare sas retzetas mentovadas in sos romantzos de sa prèmiu Nobel de Sardigna.

Dae mesa in mesa e dae addòbiu in addòbiu, duncas, su menu de Grazia Deledda sighit a isgloriare sos palados.

Sas retzetas de sa prèmiu Nobel rapresentant pratos fatos cun ingredientes chi essint a pìgiu dae sas òperas suas. Ant a èssere pròpiu custos pratos sos protagonistas mannos de s'addòbiu solidale "A Cena con Grazia". S'addòbiu s'at a isboligare su 11 de su mese de nadale 2022.

Ma cale est s'obietivu de sa chena solidale? S'obietivu de "A Cena con Grazia" est regollire dinare pro finantziare sa mensa pesada e ghiada dae s'assòtziu de bolontariadu vincentzianu de sa tzitade gadduresa. Pro custa resone su menu at a àere unu costu de 60 èuros a pessone e at a èssere unu biàgiu tra tastos e leturas de sos branos e de sas novellas de Grazia.

Una chena, cussa fata cun su menu de Grazia Deledda, nàschida finas dae unu traballu de chirca importante. Unu traballu fatu tra sas retzetas chi s'agantant in sos traballos de sa prèmiu Nobel pro sa literadura.

Pro afestare sa die, in coghina b'ant a èssere bator "chef" de Sardigna, est a nàrrere: Vitalia Scano de su ristorante de pische Sandalia de Roma, sa nugoresa Marina Ravarotto de su ristorante ChiaroScuro de Casteddu, Viviana Amorino, "chef " "on board" in Casteddu e Tonia Biscu de Sa Horte de su Poeta de Ulìana. No est totu. In prus de sas bator "chef" b'at a èssere peri un'àtera fèmina manna de sos forreddos: Anna Saba de Uddusò, mastra de su filindeu. Su filindeu at a èssere finas una de sas propostas de sa chena solidale, paris cun sos macarrones de busa, s'arrustu, sos pabassinos, sas catas, sa pompia e s'arantzada, s'abbardente e su Nepente. Totus pratos e bèvidas chi agatamus in sas òperas deleddianas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg