In Itireddu s'addòbiu enogastronomicu "Vin'Intermontes"

In sa Mesa - Sàbadu 10 de su mese de nadale 2022 Itireddu aberit sa ghenna sua a s'addòbiu enogastronomicu organizadu dae sa Pro Loco e dae sa Comuna. Sa manifestatzione, chi at comente tìtulu "Vin'Intermontes", ocannu lompet a sa de noe editziones e at a incumentzare a sas 17.00 cun s'istrino de sos naschimentos.

"Vin'Intermontes", tocat a lu nàrrere, in prus de sa Pro Loco e de sa Comuna de Itireddu at tra sos atores suos unos cantos assòtzios de sa bidda e s'at a isboligare finas pro more de unu contributu de sa Regione Autònoma de Sardigna.

"Vin'Intermontes" l'ant a fàghere in su tzentru istòricu de Itireddu, duncas faeddamus de un'addòbiu chi dat sa possibilidade a sos bisitadores de connòschere mègius sa bidda e, passìgia passìgia, finas cussa de bufare una tassa de binu bonu e de tastare unos cantos pratos tìpicos de Itireddu. Binu e màndigos ant a èssere ofertos dae sos assòtzios e dae sas cantinas locales. Pro nde godire at a tocare a dare un'oferta simbòlica.

Paris cun s'enogastronomia tìpica at a indanimare sa manifestatzione finas su clima familiare e s'iscenografia ùnica chi faghent de custa bidda-naschimentu una firmada chi non si podet pèrdere.

Comente atzinnadu, sa festa at a abèrrere su sero de sàbadu 10 a sas 17.00 pròpiu cun s'istrino de sos naschimentos. Comente acontesset onni annu, difatis, in su giardinu de s'assòtziu "Sabore de Antigu" est istadu fatu unu naschimentu cun personàgios de Sardigna. Custu naschimentu est a mannària naturale. Non est totu, pro ite un'àteru naschimentu s'at a pòdere ammirare in su tzentru istòricu. Tocat a pretzisare ca in Sardigna custu naschimentu est ùnicu in gènere suo: est fatu de figuras a mannària naturale leadas dae sa bruntzistica figurada cun sa Nàschida, cun sa mama de s'ochidu, su capu tribù, sos pastores, sos animales e sos chi dant sas ofertas.

"Vin'Intermontes" dat a sos bisitadores finas sa possibilidade de bisitare "Casa Farris" e "Casa Uleri", duas domos in ue s'agatat unu nùmeru mannu de trastos de sa cultura masserìtzia.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22