Naschet "Aprofundimentos", su progetu chi cheret rapresentare unu megafonu de sa Sardigna

Sa punna est dare boghe a sos temas de atualidade in Sardigna
30 Mese de idas 2022
aprofundimentos

Aprofundimentu de su chenàbura - Su nùmene suo est Aprofundimentos e dae oe, chenàbura 30 de su mese de idas 2022, at a acumpangiare a sos leghidores de IlMinuto notizie Mediterranee.

Custu progetu, chi naschet cun sa punna de dare boghe a sos temas de atualidade, at a èssere su megafonu de s'ìsula nostra e at a rapresentare finas sa boghe de un'àtera Sardigna, cussa de sas realidades minores, de sos assòtzios culturales, de sa polìtica bìvida comente impignu sotziale e tzivile.

Dae oe a mèrcuris 4 de su mese de ledàmine de su 2023, pro tres bortas a sa chida amus a aprofundire argumentos interessantes, sos chi amus a cunsiderare comente sos prus importantes.

Fìgios de sa terra nostra, amus a fàghere custa rubrica in sa limba de Sardigna. Aprofundimentos at a essire in onni setzione de su giornale: dae sa setzione dedicada a s'economia a cussa chi pertocat a sos temas sotziales, dae cussa dedicada a sa cultura a s'istrutzione, dae sa polìtica a s'ambiente, dae sa setzione dedicada a su traballu a cussa chi faeddat de sos animales. Gosi, pro sos leghidores de su giornale nostru su progetu Aprofundimentos at a rapresentare un'istrumentu de aprofundimentu econòmicu, sotziale e culturale de interessu mannu.

S'isperu chi at mòvidu sas ideas chi sunt su fundamentu de custa rubrica est su de segudare unu pùblicu chi ischit impitare internet e est abituadu a lèghere novas in sos giornales online. Onni lunis, onni mèrcuris e onni chenàbura bolemus lòmpere a custos leghidores cun sa finalidade de produire una connoschèntzia noa.

No est totu. Difatis tocat a pretzisare ca su progetu Aprofundimentos at a èssere realizadu cun sa partetzipatzione de s'"Assessoradu de s'Istrutzione Pùblica, Benes Culturales, Informatzione, Ispetàculu e Isport" de Sa "Regione Autònoma de Sardigna". Sa rubrica, duncas, est finantziada dae su Bandu IMPRENTAS 2022-2023. LR 22/2018, art. 22.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
ras