Sa rèsessida de s'ògiu San Giuliano de S'Alighera

Pro su de duos annos consecutivos s'azienda aligheresa lompet a su cumandu de sa classìfica fata dae sa "Evoo World Ranking"
31 Mese de idas 2022
in sa mesa

In sa Mesa - Sa nova est frisca frisca. Difatis, sa nota de imprenta est arribada eris, 30 de su mese de idas 2022. A la mandare est istadu s'ufìtziu de imprenta de s'azienda agrìcula San Giuliano de S'Alighera. Una realidade de primore chi àteras bortas at fatu iscrìere de sei. Ma pro ite oe faeddamus galu de custa azienda? Sa resone est sèmplitze. Difatis, pro su de duos annos consecutivos s'azienda aligheresa produtora de ògiu lompet a su cumandu de sa classìfica fata dae sa "Evoo World Ranking", est a nàrrere ca custa realidade produtiva s'agatat in sa "Top 10" de totu su mundu e, cosa prus importante, est istada giuigada comente s'azienda italiana mègius in totu su mundu pro sa produtzione de ògiu.

Ma no est totu, pro ite feti in s'annu 2022 sunt sa bellesa de 68 sos reconnoschimentos otentos dae sa San Giuliano de S'Alighera. Su valore de sos produtos de s'azienda sarda est istadu reconnòschidu dae Tokyo a New York, dae Gerusalemme a Zurigo, dae Pechino a Berlino. Custa est una cosa meda importante pro sos nùmenes de S'Alighera e de sa Sardigna, connòschidos in totue pro sos produtos de primore.

Sos ògios ermanos chi sa San Giuliano faghet cun sa Monocultivar Bosana - si pretzisat in sa nota de imprenta imbiada dae sa San Giuliano etotu a sas redatziones de sos giornales - sunt istados sos prus premiados e sos prus apretziasos dae sas giurias de totu su mundu. Ma, tocat a sutalineare, sos reconnoschimentos sunt arribados finas pro sa lìnia "Premium Fruttato", pro su "Biologico Cuor d'Olivo", po su "Primér" e s'"Originale". Onni produtu numenadu at otentu puntègios artos meda.

Cale est sa crae de custa resèssida? A custa pregunta sos de sa San Giuliano respondent ca sos fundamentas de sa resèssida sunt rapresentadas dae su traballu de chirca fitiana chi sos de s'azienda faghent pro megiorare sas produtziones issoro. Sa punna est sa matessi chi at acumpangiadu s'istòria de sa realidade produtiva de S'Alighera: produire feti ògiu ermanu de primore.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg