Sa Sardigna premiada dae sa "Top italian food"

In sa Mesa - Sa Sardigna est istada premiada dae "Top italian food". Difatis sunt sete sas realidades produtivas sardas presentes in sa classìfica de "Gambero Rosso". Binchent su risu, sos durches, su mele e su casu de s'ìsula. Su reconnoschimentu est importante e premiat s'impignu de sas impresas isulanas.

Sa Sardigna, duncas, si dimustrat una terra de alimentos interessantes; no est pro nudda ca s'ìsula batit semper a domo resèssidas mannas. At a èssere puru pro ite sos produtos sardos rapresentant bene s'identidade territoriale de s'ìsula e sa biodiversidade sua.

In àteras paràulas, sa terra de sos sardos si cunfirmat mama de màndigos bonos e a lu nàrrere est pròpiu sa "Top italian food" de "Gambero Rosso". Ma ite est sa "Top italian food"? Est una ghia de importu chi premiat sas impresas agrualimentares mègius de su "Made in Italy".

In s'editzione de su 2023 sunt a beru medas sas novidades presentadas e, tocat a lu pretzisare, sunt una prus interessante de s'àtera. Pro sa Sardigna, comente amus naradu, su "Gambero Rosso" dat su reconnoschimentu a sete aziendas sardas, una in prus cunforma a s'annu coladu.

Tra sas realidades produtivas de Sardigna chi ant otentu su bullinu de calidade agatamus duos produtos de s'azienda Passiu de Aristanis, est a nàrrere s'"autentico Carnaroli Classico" e su risu "Aromatico Gange". De ogni manera in sa "Top Italian food" faghet s'intrada sua finas su "Riso Thai Aromatico" de "Risoristano - Azienda Agricola Dr. Stara" de Santeru. Galu, agatamus su "Savoiardone di Sardegna", unu prudutu de primore de s'azienda "Tipico" de Fonne. Su durche intrat in sa ghia pro sa de duas bortas consecutivas. Sa cunfirma lompet finas pro àteras duas aziendas de Sardigna: s'azienda de Roberto Arru de Aùstis, premiada pro su mele de lidone, e sas "reginette" de s'ofelleria "Esca" de Durgali.

No est totu. In sa "Top italian food" intrat peri su "Giglio Sardo Extra" de "Argiolas Formaggi" de Patiolla e su "Granduca Di Mandas" de su casifìtziu "Antonio Garau dal 1880" de Mandas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22