In Sìligo s'editzione 2022 de sa "Festa della salsiccia"

In sa Mesa - Sìligo, sa bidda de Maria Carta e de Gavino Ledda, afestat unu màndigu de sa traditzione: su sartitzu. Lu faghet cun s'editzione 2022 de sa "Festa della salsiccia", un'addòbiu organizadu dae sa Pro Loco de Sìligo pro sàbadu 10 de su mese de nadale. Semper e cando, in sa bidda in provìntzia de Tàtari chi s'agatat in sa regione de su Meilogu, su programma de sa manifestatzione non previdit feti màndigos, ma finas mùsica e unos cantos momentos de cultura, una mustra de fotografias e giogos.

No est totu, pro ite in Sìligo, in custa die de festa, de nuscos e sabores at a èssere possìbile peri bisitare sa crèsia de Santa Vitòria, sa crèsia de Santa Croce, su museu de Maria Carta (in ue s'at a isboligare sa mustra) e, dae sas 10.00 a sas 13.00, s'ant a podere bisitare peri su Planetàriu e sos giogos de linna chi s'agatant in pratza Maria Carta.

No est acabada inoghe. Difatis sa die de sa "Festa della Salsiccia" at a èssere "colorada" e indanimada dae sa mùsica de sos "Double Douse", dae sa mùsica de "Marty" e "DJ Jo", dae sa mùsica de "Dj Emanca", dae sa mùsica de "I Zeppara" e dae sos sonos de su grupu "Ballade Ballade Bois".

Sa "Festa della salsiccia" lompet ocannu a sa de barantatrès editziones. Custa tarea est mèritu de su sartitzu silighesu, est a nàrrere de su rei de sa festa etotu. Su sartitzu de Sìligo est unu produtu tìpicu de sa bidda, unu produtu chi si faghet sighende una retzeta traditzionale de Sìligo. Sa retzeta previdit s'impreu de petza de porcu. Su porcu, però, devet èssere allevadu lìberu in su territòriu de sa bidda. Pro fàghere su sartitzu s'impreant finas: sale, pìbere, pìbere gravellu, fenugru agreste, nughemuscàda e àgiu incarcadu in s'abba e fumiadu in intro de sa tziminera.

Comente de avesu, in programma bi sunt sos tastos de sos paninos cun sartitzu fatos a manera rigorosa dae sa Pro Loco de Sìligo. Sos tastos ant a incumentzare a sas 10.00 de sàbadu e ant a sighire pro totu sa die paris a àteras propostas licantzas a incuru de sos assòtzios de sa bidda. Tra custas: casu cotu, pulenta, pane untu. Totus sos màndigos ant a èssere acumpangiados dae una tassa de binu o de birra.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22