In Tortolì s'afestat su mare cun su "Festival della Laguna"

In sa Mesa - Domìniga 4 de su mese de nadale Tortolì afestat su mare cun sa primu editzione de su "Festival della Laguna", un'addòbiu organizadu dae sa "Cooperativa Pescatori Tortolì" presèdida dae Luca Cacciatori.

Unu programma ricu, su de su "Festival della Laguna", una manifestatzione in ue s'at pòdere leare parte a unos cantos laboratòrios esperentziales, e finas una festa chi cumbidat a passigiadas in s'oru de s'istàniu. De ogni manera su "Festival della Laguna" est meda prus de custu, est un'addòbiu licantzu e interessante, in ue su bisitadore at a pòdere tastare su "street food" de mare e de terra de su territòriu e finas sa birra màstrina produida in Tertenia, Barì e Tortolì.

Sos chi sunt amantiosos de su binu ant a pòdere gloriare su paladu issoro cun una tassa de binu de sa "Cooperativa Pescatori", est a nàrrere cun una tassa de su "Gioga Marina" o de su "Rosso del Pescatore". Galu, su bisitadore at a pòdere leare parte finas a sa mustra mercadu de sos produtos tìpicos, e at a pòdere connòschere sas propostas de s'artesanadu de su logu e cuntentare sas origras suas cun sos ispetàculos de mùsica "live". Ant a sonare "band" musicales e istrumentistas. No est totu, pro ite b'at a èssere ispàtziu peri pro cantantes solistas.

Ma cale est sa punna de s'addòbiu aprontadu dae sa "Cooperativa Pescatori Tortolì"? Sa "Cooperativa" at s'obietivu de fàghere bìvere a su bisitadore un'esperièntzia de s'Ogiastra chi siat mera e sìnchera, un'esperièntzia ogiastrina a 360° chi interessat siat a sos produtos tìpicos de su territòriu siat a sos màndigos de sos piscadores e su "street food" de petza.

Su "Festival della Laguna" at a incumentzare a sas 10.30, in carrera "Riva di Ponente", localidade "Peschiera San Giovanni", e s'at a concruire a sas 17.00. S'addòbiu s'at a isboligare in sos tretos de sa "Cooperativa Pescatori Tortolì", est a nàrrere tra sa laguna e su mare, dae curtzu de su "Chiosco di Ponente".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22