Cras sa Sardigna afestat su "World Pizza Day"

Aprofundimentu de su lunis - Cras, 17 de su mese de ghennàrgiu, finas in Sardigna est sa die de su "World Pizza Day". Sa Sardigna, difatis, at ultres 1.500 pitzerias màstrinas. Sos sardos gastant prus de 300milliones de èuros pro unu màndigu italianu amadu meda. Nointames sa crisi "sa gana de mandigare cosas bonas non si firmat - pretzisant Serra e Rau de 'Confartigianato Sardegna'-, de ogni manera sutalìneant puru ca "sas impresas patint sa carestia de sas matèrias primàrgias, de s'energia e de sos trasportos", però sa pitza aguantat! 

S'Alighera, pro fàghere un'esèmpiu - est sa tzitade in ue sunt istadas cunsignadas a domo su nùmeru prus artu de pitzas. 

Margherita, ortulana o bator istajones, napulitana o romana, fine o grussa, bianca o conduida cun ogni bene de Deus, sa chi binchet semper sa gherra est sa pitza clàssica tunda e cota in su forru a linna.

Paris a totu su mundu, cras 17 de su mese de ghennàrgiu, sa Sardigna afestat su "World Pizza Day", sa festa mundiale de sa pitza, istituida, lu ammentamus, in su 2017, cando at retzidu dae s' "UNESCU" su tìtulu ufitziale de "Patrimonio Mondiale dell'Umanità".

Unu màndigu chi no connoschet làcanas, no est pro nudda ca sa pitza est intrada finas in sa cultura gastronomica de Sardigna. 

"Su de su mastru de s'arte bianca - afirmat Marco Rau, delegadu de 'Confartigianato Sardegna' pro  s'alimentare - est unu traballu chi cheret atinamentu, cussèntzia e istùdiu: su mastru de sa pitza de oe est meda prus lestru a cumprèndere su mundu, e faghet chirca manna in subra de sas matèrias primàrgias, pro ofèrrere unu produtu saboridu e in su matessi tempus finas sanu".

A cantu si faghet ischire s' "Ufficio Studi di Confartigianato Sardegna", in su 2022 in s'ìsula sas pitzerias màstrinas sunt 1.519: in sa provìntzia de Casteddu sunt 786, in sa Sardigna de su cabu de susu 465, in Nùgoro 786 e in Aristanis 75.

Pro mandigare pitzas, sos sardos in su 2021 ant gastadu 300millionis de èuros pagu prus o mancu, est a nàrrere 410 èuros pagu prus o mancu a famìlia. Galu, in su 2022 su mastru de pitza est su mestieri prus chircadu dae su mercadu.