Fotografia, prèmiu nou pro s'artista sarda-milanesa Marina Spironetti

Su reconnoschimentu est lòmpidu pro more de unu “autoretratu” tiradu in Avignone. Mentzione pro unu retratu de sa giornalista desulesa Daniela Melis bestida cun sos colores e sas robas de bidda sua
27 Gennàrgiu 2023
Marina Spironetti

Sa fotografa sarda-milanesa Marina Spironetti torrat a bìnchere – a pustis de s’editzione 2016 – su prèmiu Travel Photographer of the Year in sa categoria iTravelled.

Sa prima borta bincheit cun una foto tirada in sos Campos elìseos in ocasione de sa parada de su 14 de trìulas. Como su reconnoschimentu est lòmpidu pro more de unu “autoretratu” tiradu semper in Frantza, in Avignone, cun sas lughes serentinas de s’istiu chi ondrant sugetu, incuadradura e sa guarnissa de unu gùturu a sole oramai ghetadu.

Ma su pìngiu sardu no est petzi in sas raighinas suas (sa mama est portuturresa): Spironetti at otènnidu finamentas una mentzione ispetziale in sa categoria Cultures cun unu retratu de sa giornalista desulesa Daniela Melis bestida cun sos colores e sas robas de bidda sua.

Spironetti, chi sos colores e sas robas de sos bestires sardos nche los at postos in su libru suo “Senza Mare” nch’at a èssere torra in terra nostra / terra sua pro acumprire a unu progetu chi pertocat pròpiu sa bidda barbaritzina.

M.P.

© RIPRODUZIONE RISERVATA
Tags