"Quello che è mio": su film nou de Gianni Cesaraccio

Bator istòrias de denùntzia pro nos contare sa disaura de sos militares fertos dae tumore in sos polìgonos de Sardigna
18 Gennàrgiu 2023
aprofundimentos

Aprofundimentu de su mèrcuris - "Quello che è mio" est unu film curtzu chi si faghet pensare. Unu film chi nos contat sa disaura de sos militares fertos dae tumore in sos polìgonos de Sardigna.L'at giradu su tataresu Gianni Cesaraccio, babbu finas de sos film "Noi siamo il male" e "Valerio" ("Valerio" - lu ammentamus - est su film chi in su 2020 at bìnchidu "Visioni Sarde").

"Quello che è mio" contat s'istòria drammàtica de bator ex saldados chi a pustis de àere fatu servìtziu in sos polìgonos militares benint a ischire de èssere malàidos de tumore. Faeddamus de bator òmines de Istadu chi dae s'Istadu sunt istados abbandonados.

Bator sas istòrias de vida e de maladia, bator sos òmines chi s'agatant a afrontare sa fase ùrtima de su cancru e chi, in su contu de fantasia de Cesaraccio, detzident de si leare sa rifata chi s'Istadu lis at dennegadufurende a sas bancas de sas biddigheddas de Sardigna.

Ma cale est s'obietivu de sos bator ex militares? In s'obietivu issoro non b'at nudda de criminale. In s'obietivu issoro b'est feti s'amore pro sa famìlia. Sos bator òmines, difatis, cherent regutzulare dinari pro permìtere a sa famìlias de bìvere cun dignidade a pustis de sa morte issoro.

"Quello che è mio" cheret èssere unu film denùntzia in subra de su dramma chi bivet unu nùmeru mannu de ex militares.

Su film de Cesaraccio, chi at comente produtore Fabio Donatini e Chiara Nicoletti e comente collaboradore Tore Cuneddu cun "Terra de Punt", essit pro "Zarathustra Film" e s'isboligat tra Tzàve, su lagu de Cuga in Uri e Tàtari.

"Quello che è mio" est unu film curtzu chi naschet dae un'idea de s'atore Marco Bullitta, su protagonista de su film de Matteo Fresi "Il Muto di Gallura" e finas tra sos interpretes printzipales de custu film. Paris cun Bullita agatamus peri s'atore Vanni Fois, e Antonello Grimaldi, Roberto Fara e Davide Tassi.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
ras