Reconnoschimentu importante pro su late friscu Arborea sena de latòsiu

Aprofundimentu de su chenàbura - Sa nova est de su 3 de ghennàrgiu de su 2023 e pertocat a sa classìfica de su late prus bonu presente in su mercadu. Sa cosa prus importante, però, est ca su chi semus contende pertocat a sa Sardigna, e a manera prus pretzisa atenet a unu late produidu in s'ìsula nostra. Semus faeddende de su late Arborea, chi lompet a sa positzione nùmeru unu de sa classìfica.

Ma faghimus carchi passu in dae segus. Difatis, tocat a nàrrere ca custos sunt sos resurtos de una chirca fata dae s'Universidade Federico II de Napoli e dae s'Universidade de Valencia e peri ca custa chirca pertocat a su late friscu e sena de latòsiu. Sa chirca at leadu a cunsideru 21 etichetas diferentes. Tra sos produtos esaminados non bi fiat late produidu dae aziendas biològicas. Faeddamus, imbetzes, de ampullas de late chi si podent agatare in sos mega-mercados (dae sos de sa GDO a sos discount) e finas in sas butegheddas a curtzu de domo.

Sa chirca at pertocadu a unos cantos elementos: s'igiene, sa seguràntzia, sa presèntzia in su late de sustàntzias noghiles comente sos antibiòticos, sa calidade de su produtu chi si bufat. In prus, tra sos critèrios apretziados dae sos chircadores b'est sa presèntzia de aminoacidos essentziales. Segundu sa chirca e pro sos critèrios giai numenados, su late intreu Arborea sena de latòsiu rapresentat su produtu mègius tra sas etichetas chi agatamus in su mercadu. Su late Arborea sena de latòsiu est su resurtu de su traballu de un'azienda, sa 3A de Arborea, chi atendet cun amore a sas bèstias suas.

Segundu sos chircadores sa calidade de su late Arborea est arta meda e difatis custu est unu produtu adatu finas pro sos pitzinnos.

Sighint in sa classìfica su late "Mila senza Lattosio", chi si produit in Sud Tirolu e lompet a su de duos postos in sa classìfica, e su late "Candia Gran latte", chi òcupat sa de tres positziones. A suta su late "Parmalat" e su "Granarolo".