Sa Sardigna tra sas regiones europeas interessadas dae s'initziativa "Cosmetic Victories"

Aprofundimentu de su mèrcuris - Su nùmene suo est "Cosmetic Victories" e est un'initziativa promotzionada dae sa retza "Enterprise Europe Network" in intro de sa prataforma "Go4Cosmetic". Su sugetu promotore suo est sa Commissione Europea e tocat finas a pretzisare ca "Cosmetic Victories" pertocat a su campu de produtos pro sa bellesa e est un'initziativa chi ocannu lompet a sa de oto editziones.

Ma pro ite oe faeddamus de cust'initziativa in intro de una rubrica de aprofundimentu chi pertocat a sa Sardigna? Sa risposta est sèmplitze: pro ite tra sas regiones europeas chi ant a leare parte a "Cosmetic Victories", paris cun sa Centre-Val de Loire, sa Normandia, sa Lombardia, su Centro portughesu, sa Catalogna, sa regione de Lublino in Polonia, s'Olomouc e sa regione Nord-Ovest de sa Romania b'at finas sa Sardigna.

Organizada dae "Cosmetic Valley" (Frantza), s'initziativa atenet a progetos de chirca e innovatzione ligados a s'indùstria de sos produtos de bellesa e at sa punna de premiare istudiantes, chircadores, start up e PMI. Sos prèmios - si leghet in su giassu internet de "Sardegna Ricerche - Sardigna Chircas" - ant a èssere duos: s'"Academic Prize", chi est dedicadu a progetos de chirca fatos dae chircadores, dotores de chirca e finas istudiantes, e s'Industry Prize, chi imbetzes at a premiare a s'innovatzione mègius in su setore de sa produtzione industriale de produtos de bellesa. Sas protagonistas de su de duos prèmios ant a èssere: start up, PMI e finas manager industriales. Ambos sos binchidores ant a retzire 10.000 èuros de prèmiu e in prus ant a èssere agiudados dae "Cosmetic Valley" pro isvilupare su progetu issoro.

Sa dimanda de partetzipatzione si podet imbiare intro su 31 de su mese de ghennàrgiu chi at a bènnere.

Bisòngiat finas a sutalineare ca sos candidados de sa Sardigna podent benefitziare de s'agiudu de "Sardegna Ricerche -- Sardigna Chircas", s'agentzia de sa Regione Autònoma de Sardigna chi est partner de sa retza "Enterprise Europe Network".

Chie cheret àteras informatziones podet tzerriare su nùmeru +39 070.9243.1 o iscrìere a: een@sardegnaricerche.it