Emergèntzia tzilibirche, 26 biddas interessadas
Anela, Austis, Benetuti, Bidoniu, Bono, Bortigale, Bòtidda, Duarche, Golothene, Isporlatu, Illorai, Lei, Noragùgume, Nughedu Santa Itòria, Ortzai, Onieri, Orane, Oroteddi, Otzana, Sarule, Sèdilo, Silanos, Sorradile, Su Burgu, Teti, Urtei. Su territòriu de custos 26 Comunos de Sardigna, 134mìgia ètaros in totu, est s’àrea delimitada dae sa Regione in contu de emergèntzia tzilibirche.
In intro de custa zona b’at de marcare belle 33mìgia ètaros giai infestados gasi partzidos: 6.627 ètaros cun “arriscu artu” in sas cussòrgias de 15 biddas e 26.177 ètaros cun “arriscu” genèricu interessende 23 Comunos. Prus de 100mìgia sos ètaros de doa.
Custa àrea l’at delimitada su Servìtziu fitosanitàriu regionale in pare cun s'aprovu de sas medidas pro cuntrastare sa difusione de s’aligusta marochina (Dociostaurus maroccanus).
Sos meses e sas chidas coladas sas organizatziones de categoria aiant criticadu sa Regione. A bisu de Coldiretti ant projetadu una pellìcula giai connota.
«A concruos de su tziclu biològicu de su tzilibirche – aiat naradu su presidente de Nùgoro-Ogiastra Leonardo Salis - su problema isparesset e si nde torrat a faeddare s’annu a pustis, a invasione noa e cun interventos pagu dèghidos o assentes de su totu».
«Gherrende contra a su tzilibirche – nargeit Michele Ena de Confagricoltura Nùgoro-Ogiastra s’atòngiu coladu – semus trighende. Tocaiat a laurare a concruos de austu e, a pustis de 90 dies su Pianu de atzione est petzi unu bìculu de pabiru».
E luego s’ant a abèrrere sos oos.
M.P.