Presone minorile de Quartùciu, sa garante Irene Testa: «A la serrare e sos pitzocos in logos dèghidos»

«Un’istrutura nàschida pro èssere una presone de seguresa màssima chi oe acasàgiat oto pitzocos cun duos ebbia sardos; un’edifìtziu de 5mìgia metros cuadros cadruddu e in cunditziones precàrias in prus de una parte; bidros segados, umididade, ruìngiu in totue». Sunt sos faeddos publicados dae Irene Testa, militante radicale e dae pagu garante in Sardigna de sas persones privadas de sa libertade issoro, a pustis de àere compidadu sa presone minorile de Quartùciu. «Dae cando est chi fatzo bìsita a sas galeras, galu fia a la bìdere un’istrutura che a custa. Peus de unu canile est. No est cosa de atzetare s’idea chi si potzant torrare a educare sos giòvanos in logos che a custos. Custa est una situatzione grave chi custringhet sos giòvanos, e fintzas chie bi traballat, a bìvere in mesu a sa suferèntzia e a su degradu». Sa garante at annuntziadu chi at a pedire cun urgèntzia a sas autoridades cumpetentes de serrare s’istitutu e de nche giùghere sos pitzocos in comunidade, «in logos prus dèghidos pro chi potzant torrare a pustis a intro de sa sotziedade».

m.p.