Presone minorile de Quartùciu. Su Procuradore generale de sa Repùblica pedit una relatzione

Sa batalla de sa garante Irene Testa pro nche giùghere sos pitzocos in comunidade
28 Fiàrgiu 2023
Irene Testa

«Li torro gràtzias a su Procuradore generale de sa Repùblica de sa Corte de apellu de Casteddu ca, a pustis de sas paràulas meas una bia bisitada sa presone minorile de Quartùciu, at pedidu una relatzione de sas cunditziones de s’istrutura e informatziones pro su chi pertocat sa gestione de sa matessi a su Procuradore de sa Repùblica de su Tribunale de sos minores e, de prus, nd’at dadu a ischire a su ministru de sa Giustìtzia e a su tzentru pro sa Giustìtzia minorile de Sardigna». L’at naradu Irene Testa, militante radicale e dae pagu garante in Sardigna de sas persones privadas de sa libertade issoro chi gasi sas dies coladas aiat faeddadu de sa galera: «Un’istrutura nàschida pro èssere una presone de seguresa màssima chi oe acasàgiat oto pitzocos cun duos ebbia sardos; un’edifìtziu de 5mìgia metros cuadros cadruddu e in cunditziones precàrias in prus de una parte; bidros segados, umididade, ruìngiu in totue». Agiunghende: «Dae cando est chi fatzo bìsita a sas galeras, galu fia a la bìdere un’istrutura che a custa. Peus de unu canile est. No est cosa de atzetare s’idea chi si potzant torrare a educare sos giòvanos in logos che a custos. Custa est una situatzione grave chi custringhet sos giòvanos, e fintzas chie bi traballat, a bìvere in mesu a sa suferèntzia e a su degradu». Sa punna abarrat sa matessi, est a nàrrere a nche giùghere sos pitzocos in comunidade.

© RIPRODUZIONE RISERVATA