A sa de 11 editziones su cuncursu enològicu internatzionale “Grenache du Monde”

Abertas sas iscritziones
27 Fiàrgiu 2023
aprofundimentos

Aprofundimentu de su lunis -  Pro sas aziendas vitivinìcolas de Sardigna lompet ocannu puru su tempus de sas adesiones a su cuncursu “Grenache du Monde”. Unu cuncursu enològicu internatzionale, lu ammentamus, chi de annu in annu faghet a connòschere in totu su mundu unas cantas realidades sardas produtoras de binos de primore.

Su “Grenache du Monde” lompet a sa de 11 editziones e lu faghet cun sa novidade prus manna, est a nàrrere ca pro sa primu borta in s'istòria sua lassat sas regiones de Europa pro s'America. S'editzione de su 2023, difatis, at a èssere acasagiada in sa tzitade de New York in su mese de làmpadas. Sos binos de Sardigna, duncas, ant a làmpere a su coro de su mercadu internatzionale.

Tocat peri a regordare ca su cuncursu est aprontadu dae su “Conseil interprofessionnel des Vins du Roussillon (CiVR)” e at su paternariadu de s'“Agenzia Laore Sardegna”.

Comente si podet cumprèndere dae su nùmene suo, podent leare parte a su “Grenache du Monde” sos binos otentos dae àghinas de sa famìlia “grenaches”. Faeddamus duncas de sos binos Cannonau in ogni variedade sua, sos Garnatxa, sos Garnacha, sos binos Tai nieddu, sos Gamay de su Trasimeno, sos Granaccia, sos binos Bordò, sos Alicante e sos Lledoner pelut.

Sos binos, chi podent èssere biancos, nieddos e peri rosados, devent èssere a denominatzione de orìgine protègida, est a nàrrere: IGT, DOC e DOCG.

Sas setziones de su cuncursu ant a èssere duas: binos cun prus de s'85% de “grenaches” e binos cun prus de 51% de “grenaches”.

Tocat finas a pretzisare ca pro leare parte a sa manifestatzione sas cantinas devent imbiare s'iscritzione issoro e lu devent fàghere intro su 31 de su mese de martzu 2023 a sas 12.30. Su documentu pro s'iscrìere s'agatat siat in su giassu internet de s'”Agenzia Laore Sadegna” siat in un su giassu internet de su cuncursu “Grenache du Monde”.

Pro àteras informatziones si cussìgiat de intrare in su giassu de s' “Agenzia Laore Sardegna”.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras