Sistemas ìdricos, 200 milliones de metros cubos in mancu cunforma a ghennàrgiu 2022

S’ierru de custas chidas, cun abba e nie bundantes, at mudadu sa situatzione de sos sistemas ìdricos sardos a pustis de un’atòngiu a sicu.

A como b’at unu milliardu e 398 milliones de metros cubos cun su 76,6% de sa capatzidade de sas digas. A concruos de annu sa pertzentuale nche colaiat de pagu su 60%, ma est beru finamentas chi bi mancant 200 milliones de metros cubos pro nche lòmpere a sos livellos de su mese de ghennàrgiu de s’annu coladu (cando su datu fiat de s’83%).

Non mancant duncas sos oriolos in contu de abba netzessària pro sos tempos imbenientes. Mescamente osservende a sas pertzentuales de unos cantos sistemas: carchi cosa in mancu de su 37% pro su Cixerri artu e 39% pro su Taloro artu. Su datu paret prus in sa norma si imbetzes de sos sistemas ìdricos abbaidamus a sas zonas idrogràficas.

M.P.