Thiniscole, unu cursu de disegnu e pintura cuidadu dae s’artista GioFoe

Custu sàbadu in Thiniscole at a èssere presentadu unu cursu de disegnu e de pintura ammaniadu dae s’artista murale Giorgio Forlano. GioFoe, custa sa firma sua, est un’esponente de sa street art, autore de retratos mannos chi si podent abbaidare in bidda sua, binchidore de prèmios in aterue (che a su chi at otènnidu in Pisa pintende a Galileo Galilei) e protagonista de addòbios artìsticos internatzionales (che a s’ArtKeys 0.1 de Agropoli).

«S’idea de custu cursu naschet – narat s’artista – punnende a ofèrrere unu contributu culturale a sa bidda mea. Est unu cursu chi cheret agiudare sas persones a livellu artìsticu, pro lis acrèschere sas capatzidades tècnicas issoro e pro chi siant a tretu de espressare sa creatividade chi tenent in intro». Su cursu at a èssere presentadu dae sas 16.30 a sas 20 in su tzentru giovanile. «A pustis de lu descrìere – narat GioFoe faeddende de su cursu – apo a collire sas iscritziones dende informatziones in contu de dies, oràrios e materiales».

M.P.