Tumores, sas Fèminas lìberas: «in Tàtari mancant sos tècnicos de radiologia»

Pedidas assuntziones noas e càmbios pro chi funtzionet sa radioterapia
11 Fiàrgiu 2023
donne libere in lotta per il diritto alla salute

«In Tàtari e in totu sa Sardigna b’at una mancàntzia manna de tècnicos de radiologia e pagu o nudda est su chi si faghet pro chi s’agatet una solutzione». A lu nàrrere sunt sas fèminas de su movimentu “Donne Libere in Lotta per il Diritto alla Salute” faghende·si boghe de sos oriolos de sos patzientes e de sas patzientes de Radioterapia de su cabu de logu turritanu. «A su presente – sighint – non b’at singiale perunu dae sa diretzione sanitària: ne in contu de assuntziones noas (mancari cun sos tempos longos de sos cuncursos), ne in contu de sostitutziones».

Narant sas fèminas lìberas in gherra chi sa radioterapia pro s’Aou de Tàtari «est unu servìtziu pilastru, in pare cun su Dh e s’oncologia, pro sa cura de sos tumores de totu sa provìntzia». Creschent sos timores pro sos malàidos finamentas ca – serrant sas fèminas de Donne libere - «sas pagas istruturas pùblicas e cunventzionadas sunt càrrigas e su perìgulu de brincare sa terapia est cada die semper prus mannu».

M.P.

© RIPRODUZIONE RISERVATA
Tags