Una “app” contra a su bullismu

Un'iscola cuartesa faghet su test. In su progetu finas sos chircadores de s'Universidade de Casteddu
8 Fiàrgiu 2023
aprofundimentos

Aprofundimentu de su mèrcuris - Una "app" pro cumbatare a su bullismu. Sa Sardigna est in intro de custu progetu cun su Litzeu Motzo, iscola de Cuartu Sant'Aleni chi at cumentzadu su test. In su progetu b'ant finas unos cantos chircadores de s'Universidade de Casteddu.

Su progetu est possìbile gràtzias a unu finantziamentu de su "Ministero dell'Università e della Ricerca" de s'istadu italianu e interessat chicadores ispetzializados in tecnologia, in intellighèntzia artifitziale e peri in psicologia e in giurisprudèntzia .

Gosi, su 17 de su mese de freàrgiu, in su Litzeu Motzo de Cuartu Sant'Aleni noe classes ant a àere sa possibilidade de connòschere e de proare sa "app" "BullyBuster", realizada dae sos chircadores de sos ateneos de Casteddu, Nàpoli, Fogia e Bari.

Sa "app" installada in sos tzellulares o in sos computer agiudat a signalare cumportamentos, frases, video, fotografias, afrentas in chat o àteras cosas chi podent fàghere pensare a atziones de bullismu o de "cyberbullismo". A manera crara, sas signalatziones podent èssere compidadas in totus sos "device" e traballadas dae unu sistema de intellighèntzia artifitziale capassu de avèrtere a sas famìlias, a sas autoridades iscolàsticas, e, si b'at elementos, finas a sa politzia e a sos carabineris.

Su sistema est capassu de funtzionare a manera automàtica e podet èssere finas collegadu a unu sistema de video-bardiamentu. Comente bàrdia su sistema funtzionat peri si est installadu in su "smartphone", in su "tablet" o in su "computer" in ue s'impreant sos "social network", sos sitos e sas "app" pro mandare messàgios.

Non est totu. Su sistema at sa capatzidade de rilevare a manera autònoma movimentos reselos, episòdios de "stalking" e prepotèntzias, comente peri de distìnghere espressadas malarrimadas.

Sas signalatziones, in forma anònima, podent èssere insertadas in sa "app" dae chie biet sa cosa e finas dae chie at novas de cumportamentos non curretos o de argumentos multimediales illìtzitos.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras