Benèssere digitale de sos pitzinnos, unu cursu in Thiniscole

Sabadu s'11 e lunis su 13 pro babbos, mamas, educadores
2 Martzu 2023
benèssere digitale

Fàghere crèschere sa cussèntzia de sos dannos chi sos dispositivos digitales podent cajonare a sos pitzinnos a livellu fìsicu, psicològicu, relatzionale e iscolàsticu; ghiare sos pipios in unu percursu de annestru digitale pro favorire un'impreu moderadu e cussentziosu de sos matessi; amparare sas criaduras fraighende un'ambiente seguru e agatende un'echilìbriu istàbile cun sa vida reale; promòvere un'impreu positivu de sos dispositivos pro nde fàghere unu puntu a fortza e no un’impèigu in sa vida issoro.

Sunt custas sas punnas de su cursu de benèssere digitale in programma pro sàbadu s’11 e lunis su 13 de martzu, dae sas 16 a sas 19, in s'àula consiliare de s'Unione de sos Comunos de su Montalbo, in carrera de Isalle in Thiniscole. Comente afirmadu dae su Presidente de s'Unione Salvatore Ruiu, «cun custu cursu cherimus ofèrrere unu momentu formativu dedicadu a sos babbos e a sas mamas de sos pitzinnos intre sos 6 e sos 13 annos, ma est abertu a a babbos e mamas de pipios cun edade diferente, a educadores e a chie si siat tèngiat curiosidade». Su percursu s'at a isvilupare in duos mòdulos de 3 oras cada unu e sos addòbios ant a èssere coordinados dae su coach de benèssere digitale Gavino Puggioni.

M.P.

© RIPRODUZIONE RISERVATA
Tags