Istùdiu italu-americanu in subra de sos arriscos graes in su traballu

Aprofundimentu de su chenàbura - Si faeddat de traballu e perìgulu in un'istùdiu italu-americanu fatu in subra de sos arriscos graes in su traballu pro sos "over" 50. Pro cumprèndere e prevènnere elementos de perìgulu sos chircadores ant pensadu a sensores de bestire ùtiles finas pro prevènnere s'isvilupu de patologias chi ferrent a sos ossos e a sos mùscolos.

Faeddamus, duncas, de sa chirca italu-americana fata dae s'Universidade de Casteddu e dae s'Universidade "Virginia Tech" de sos USA; una chirca isseberada dae su "Ministero degli affari esteri e della cooperazione Internazionale".

Su progetu, batijadu "Powher" ("Promoting Older Worker Health for Employment Retainment"), at unu finantziamentu de 250milla èuros e est ghiadu dae Michela Porta, una chircadora giòvana de su Dipartimentu de Ingegneria mecànica, chìmica e de sos materiales de s'ateneu casteddaju. Michela Porta traballat in sa "Cittadella universitaria di Monserrato", in su Laboratòriu de "Biomeccanica ed ergonomia Industriale", est a nàrrere in su laboratòriu ghiadu dae su Professore Massimiliano Pau.

Su progetu at a impreare sa tecnologia de sos sensores chi si devent bestire. "In su tempus benidore - acratat Michela Porta a ANSA - custu acostiamentu at a pòdere sustènnere a manera eficatze s'identificatzione de sa cunditzione de traballu grae e perigulosa". Est pro custa resone chi tocat a "previdire s'impreu de interventos ergonomicos, pro esèmpiu torrende a progetare su traballu, sas modalidades operativas o puru cun s'impreu de istrumentos de assistèntzia comente sos 'esoscheletri', chi naschent pro minimare s'isfortzu fìsicu e amparare sa salude de su traballadore".

Totus sas chircas de "Promoting Older Worker Health for Employment Retainment" ant a èssere isvilupadas, lu ammentamus, in "partnership" cun su "Virginia Polytechnic Institute and State University" ("Virginia Tech", USA) e sunt parte de unu programma de cooperatzione iscientìfica e tecnològica de tres annos (dae su 2023 a su 2025). Su programma at comente protagonistas s'Itàlia e sos Istados Unidos e est riservadu a progetos presentados dae chircadores "under" 40.