Sos giornales de oe #009

«Penso chi custu Paisu e Sardigna e Sitzìlia in particulare sufrant sa positzione dominante de una cumpagnia chi, sola, controllat su 60% de su mercadu: Ryanair: su player irlandesu faghet su chi cheret in Itàlia. Gràtzias a sas grandes summas chi sos aeroportos li garantint. Issos sunt bravos meda e faghent ùtiles a milliardos, chi nche giughent in foras de Itàlia. Ma custa cumpangia distruet su mercadu e sos cuncurrentes. E peruna dificultade tenet, comente faghet in Sitzìlia e in Sardigna, a impònnere tarifas de 400 èuros pro un’ora de bolu».

Bonas dies, est custa una parte de s’intervista de La Nuova Sardegna, chi dae carchi die tenet una continuidade narrativa in contu de trasportos e gestione aeroportuale, a s’amministradore delegadu de Aeroitalia Gaetano Intrieri. Chi presentat un’alternativa a sos sardos e mescamente a sos entes locales chi «sighint a li dare dinare a Ryanair». Comente at a pòdere bìnchere s’istrategia de Aeroitalia (chi como est frisca de acordu cun sa Regione garantende unu billete de 200 èuros finas pro sos non residentes) in intro de su cuadru nou de gestione aeroprtuale cun sa fusione de S’Alighera e Terranoa e cun sa nàschida de Nord Sardegna Aeroporti? Sa Nuova pro seguru, chi at contadu cuntenta s’operatzione, nos at a tènnere informados dae como in susu.

Dae un’amministradore delegadu a un’àteru. Ca semper La Nuova oe nos contat, mancari prus in bassu, chi Rfi no est pensende a sa rete ferroviària Nùgoro – Macumere: «Diat costare tropu». Custu in sìntesi su chi at naradu s’ad Vera Fiorani in s’àula de sa cummissione trasportos de sa Càmera. E sa Regione, a su contu de sa deputada Ghirra, inoghe non bi fiat. Naramus duncas chi est fintzas cun sas crònacas polìticas chi amus a bìdere s’evolutzione de sa chistione trasportos de custa terra.

Crònaca polìtica chi, fintzas oe, nd’est suspende sas mùtrias, bonas e malas, de sos atores sardos a pustis de sa motzione de discunfiàntzia contra a Solinas. Si la Nuova, isterret sa pregonta «Solinas prus forte?» a pàgina 8, L’Unione sarda giai dae sa prima nche toddet su puntu interrogativu e iscriet a maduru: «Tzentru dereta, Solinas favoridu». A su puntu de nos fàghere lèghere s’ipòtesi de una lista Solinas presidente pro nche pònnere in intro finamentas sos cussigeris Stefano Schirru, Piero Maieli, Fabio Usai (chi sunt pensende a su benidore issoro e chi sunt in cue in cue pro si nch’essire dae su Psd’Az) e Franco Mula, prus malu a cumbìnchere. Inoghe puru b’at unu trenu chi non cheret pèrdidu.

Pnrr, apaltos, migrantes e su ricòveru de su paba sunt sas noas chi oe bidimus pagu prus o mancu in totu sos giornales italianos.