Su binu "Akènta Sub" aberit sa ghenna de su "Vinitaly"

In s'addòbiu de Verona su binu chi pasat in mare
10 Martzu 2023
aprofundimentos

 Aprofundimentu de su chenàbura -  "Akènta Sub" aberit sa ghenna de su "Vinitaly" de Verona, sa manifestatzione prus manna dedicada a su mundo de su binu.

Su binu chi pasat in su fundu de su mare de sa cantina de s'Alighera "Santa Maria La Palma", est istadu isseberadu comente "Official Wine di Vinitaly and The City", s'addòbiu chi s'isbòligat primu de s'addòbiu meru e sìncheru, e chi s'aberit su 31 de su mese de martzu cun bator dies de tastos, addòbios e apuntamentos chi ant comente "location" su coro de Verona.

Non fiat capitadu mai a unu binu de Sardigna de abèrrere sa manifestatzione internatzionale. Su chi lompet dae su Vènetu est unu reconnoschimentu importante pro totu sa produtzione enològica de Sardigna.

Totu est nou. Est una novidade peri s'issèberu de un'ampulla chi at pasadu a suta de mare. "Est unu prèmiu a s'impignu de totus sos sòtzios chi traballant onni die e chi rapresentant unu territòriu intreu", cummentant a ANSA sos responsàbiles de sa cantina aligheresa. Chi est finas tra sas realidades enologicas prus importantes de Sardigna, cun 800 ètaros coltivados e una produtzione de 5 milliones e prus de ampullas.

Comente sutalìneat ANSA, s'isperimentatzione a suta de su mare incumentzat in su 2011 cun un'issèberu de ampullas de ispumante "Akènta", fatas dae àghina de "Vermentino di Sardegna DOC" coltivadas in sas terras de su "Parco di Porto Conte", in cara de mare.

Su progetu, si leghet in ANSA - naschet comente atzione de sistema territoriale: sa coltivatzione de una bide chi benefìtziat pro èssere coltivada dae curtzu de mare, sa crèschida culturale e sa crèschida de s'aficu de sos sòtzios, sa volontade de fàghere retza cun sos àteros atores sotziales e sa valorizatzione de su logu in ue s'agatant sas bìngias, est a nàrrere in intro de un'àrea naturale amparada, elementu chi si cojat bene cun sas polìticas de calidade e de rispetu ambientale de sa cantina aligheresa de "Santa Maria La Palma".

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras