Trieste: 12 aziendas sardas pro sa de XV editziones de “Olio Capitale”

Aprofundimentu de su lunis - Est sa manifestatzione prus importante in contu de ògiu de olia. Semus faddende de su "Salone degli oli extravergini tipici e di qualità - Olio Capitale" de Trieste, chi ocannu est lòmpidu a sa de XV editziones e chi pro sas aziendas chi traballant in custu cumpartu rapresentat una fiera de interessu mannu.

Incumentzada chenàbura 10 de su mese de martzu, est sighida fintzas a eris, domìnigu 12 de martzu.

Su chi tocat a sutalineare est ca sas aziendas sardas chi ant leadu parte a sa manifestatzione sunt 12 in totu e massimamente ca custa realidades produtivas ant àpidu su sustegnu de sa Regione Autònoma de Sardigna.

Sa punna de sa RAS e de s'Assessoradu de s'Agricultura e de sa Reforma Agropastorale est sa de dare una manu de agiudu a custu cumpartu econòmicu. Unu cumpartu chi at giai otentu unos cantos reconnoschimentos de importu. Tra custos su marcu DOP pro s'ògiu de olia de Sardigna. Unu produtu chi at caraterìsticas chi lu distinghet dae sos ògios produidos in àteros territòrios.

Gosi, sa calidade de s'ògiu sardu e sa territorialidade sua sunt istadas rapresentadas dae sas 12 aziendas sardas presentes a Trieste.

Sa manifestatzione at dedicadu unos cantos addòbios a sa Sardigna. Sàbadu 11 s'apuntamentu de sas 17.00, "Profumi e sapori negli oli extravergini d'oliva tipici della Sardegna", in ue ant chistionadu Maura Boi, cordinadora regionale de s'Assòtziu "Città dell'Olio", e Giovanni Antonio Sechi, vitze-presidente natzionale de s'Assòtziu "Città dell'Olio", est istadu sighidu dae su tastos de sos ògios sardos produidos dae sas realidades produtivas presentes in sa fiera. Tocat peri a pretzisare ca su momentu de su tastu est istadu organizadu dae sos tècnicos Piera Bacciu e William Marras de s'"Agenzia Laore" de sa Regione Autònoma de Sardigna.

Sàbadu e domìnigu sos bisitadores ant àpidu sa possibilidade de tastare sos ògios sardos cun àteros ismurzos fatos cun iscartzofa sarda DOP, pane carasadu e casu.