In Casteddu su primu “pan cafè gluten free”

Produtos sena de glùtine, ma ricos de sabore
28 Arbili 2023
aprofundimentos

Aprofundimentu de su chenàbura - In Casteddu, in carrera Garibaldi, naschet Verì, su primu "pan cafè gluten free", un'idea fìgia de Francesca Basti.

Sos produtos de Verì sunt totus sena de glùtine, ma finas sena de latòsiu. Produtos sena de glùtine e sena latosiu, ma ricos de sabore, pròpiu comente sunt saboridas sas propostas veganas suas.

Verì est unu tzilleri modernu e aberit sa ghenna sua dae sas 8:00 a sas 22:00. Unu logu innovativu, in ue, acomodadas in sa mesa, sas persones celìacas podent mandigare e bufare produtos acunsentidos, est a nàrrere produtos "gluten free". Unu logu ispetziale, in ue si podet finas ascurtare mùsica e si podent finas bìvere momentos de sotzialidade a manera segura.

Verì no est feti unu tzilleri, est finas unu laboratòriu màstrinu chi faghet durches e mandigos salidos. Duncas. est unu logu in ue in prus de s'ismùrgiu cun "croissant", "muffin", pistocos, e cun sa pitza "al taglio" si podet puru bufare unu "spritz", mandigare fritadas, panadinas cun birdura, bombas, culurgiones, "hamburger" e àteras licantzadorias.

No est totu. Difatis, Verì oferit finas unu servìtziu pro chie non podet andare a mandigare in sos aposentos cosa sua. Lu faghet batende a domo sos màndigos rechèdidos dae sos clientes. E sos ispantos non sunt galu acabados, pro ite sos produtos chi non si bendint benint donados a sas "mense solidali" gràtzias a s'agiudu de sa "app To Good to Go".

Verì, duncas, est unu tzilleri chi at sa punna de satisfàghere unos cantos bisòngios, cun "menu" pensados pro acuntentare gustos diversos e pro esigèntzias de salude ma finas èticas. Unu logu in ue sos celìacos e sos chi sunt allèrgicos a su latòsiu podent mandigare produtos màstrinos e non sos sòlitos produtos industriales chi, comente sutalìneat a ANSA sa mere de Verì Francesca Basti, sunt protutos "sena de ànima, e a bias, sena de sabore".

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras