Iscola: in Casteddu incaminados 14 progetos educativos

Interessados 3880 minorennes, giòvanos e famìlias
14 Arbili 2023
aprofundimentos

Aprofundimentu de su chenàbura - Bortada educativa importante in sas iscolas casteddajas, in ue ant incaminadu 14 progetos chi interessant 3880 minorennes, giòvanos e famìlias. Sos progetos ant otentu unu finantziamentu de unu millione de èuros dae sa Comuna de Casteddu Su finantziamentu pertocat a sos fundos de su " Pon Metro 2014-2020" e est istadu afortiadu cun sas resursas istraordinàrias de su "React-Eu".

Cale est s'iscopu? Respondere a sos bisòngios cajonados dae su Covid-19, chi at interessadu pro su prus sas ànimas prus dèbiles de sa comunidade.  

Ma a chie andat su dinare? Sos destinatàrios sunt chimbe autonomias iscolàsticas pùblicas, 5 asilos pro pipieddos, bator autonomias iscolàsticas paritàrias e un'asilu paritàriu pro pipieddos. In totu sunt interessados 3380 minorennes, de custos 785 s'agatant in cunditzione de dificultade o de disvantàgiu.

Sa Comuna at fatu custu passu pro more de unu discumbèniu semper prus mannu tra sos giòvanos. Unu discumbèniu chi est ligadu finas a sa crèschida de s'abbandonu iscolàsticu. Custa e àteras resones sunt sa mòglia de su programma de contributzione istraordinària chi dat una manu de agiudu a sas autonomias iscolàsticas. Una contributzione chi lis permitit de finantziare progetos innovativos. S'obietivu est su de afortiare sas cumpetèntzias de sos giòvanos e su de acumprire  atziones chi controint  totus sa formas de esclusione, de discumbèniu e de esclusione sotziale.

Ant a èssere unos cantos sos temas abratzados dae sos progetos ativados, progetos chi previdint iscritziones a indonu pro totus, finas a chi bi sunt postos.
Su chi s'at a pònnere in òpera at a èssere unu mètodu de tipu inclusivu cun atividades de arte, isport e iscièntzia. Su progetu previdit peri laboratòrios pro imparare sas limbas, sa mùsica, pro s'iscoberta de sa natura. Totus sas atividades ant sa punna de alluere sa curiosidade, s'ispìritu crìticu, sa creatividade e sa cooperatzione.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras