S'Ìndia su prus populadu paisu de su mundu

Aprofundimentu de su mèrcuris - Cunforma a sas ùrtimas previsiones de sas Natziones unidas, sa Tzina no at a èssere prus su prus populadu istadu de su mundu. S’Ìndia nche l’est brinchende e, a concruos de mese, nch’at a lòmpere a 1.425.775.850 de abitantes. Unu milliardu, 425mìlliones, 775mìgia e 850. Amus naradu “sas ùrtimas”, ca sas primas previsiones faeddaiant de sorpassu a concruos de su mese de làmpadas. naturale, semus faeddende de previsiones e duncas no est naradu chi su surpassu tèngiat die marcada in su calendàriu. Duncas de aprossimatziones.

Pro nàrrere, pro custos càrculos ant mòvidu dae sos tzensimentos sighende posca sos datos amministrativos de sas nàschidas e de sas mortes. Ma sos tzensimentos non sunt che pare (s’ùrtimu de s’Ìndia est de su 2011). E pro su chi pertocat sos agiornamentos de chie naschet e de chie si nche morit b’at de pigare in cunsideru sa mannària de su màrghine de errore. Duncas, mancari sa tendèntzia siat delineada, no l’amus a ischire si s’Ìndia at a èssere sa prima a concruos de abrile o a concruos de làmpadas.

Capatze chi a sa Tzina nche l’apat fintzas giai colada. Semper e cando cheret chi ammentemus chi sos duos paisos ant connòschidu un’isvilupu demogràficu gasi mannu a su puntu de àere netzessidade de polìticas de controllu de sas nàschidas. Cun sa diferèntzia chi custas polìticas ant funtzionadu mègius in Tzina e cun resurtos chi s’Ìndia at bidu petzi a pustis. In su 1971 su tassu de fecundidade fiat su matessi cun 6 criaduras in mèdia pro cada fèmina in bida sua. Sa Tzina est falada a 3 dae 6 a concruos de sos setanta; s’Ìndia su matessi resurtu l’at marcadu a metade de sos annos 2000. A su presente in Tzina naschent 1,2 pitzinnos pro cada fèmina; 2 in Ìndia. A cando a su 2050 su paisu indianu nch’at a lòmpere a 1,66 milliardos; sos tzinesos ant a èssere 1,3 milliardos.