Sos giornales de oe #013

«Cumpetitividade, sa Sardigna si nch’assentat a sa de 203 positziones (perdende·nde 41 in tres annos) in sa classìfica europea de 233 regiones. E sos fundos de su Pnrr – 2,6 milliardos de èuros cun, pagu prus o mancu, àteros 300 milliones de su fundu cumplementare – sunt in perìgulu. Sos sìndigos sardos galu lamentende·si de sa mancàntzia de personale tècnicu, de sa burocratzia e de sos tempos istrintos». Custu lu leghimus in L’Unione sarda chi tìtulat «Cumpetitividade, s’Ìsula in foras de radar»..

«Pnrr, progetos blocados, Comunes abbandonados». Custu est imbetzes su tìtulu de La Nuova Sardegna chi gasi sighit in prima pàgina: «Intre Uniones de sos Comunes, Comunidades montanas e Tzitades metropolitanas, b’at 39 entes chi diant àere bisòngiu de nessi tres o bator tècnicos cadaunu. In totu diant serbire intre sos 130 e sos 140 tècnicos in agiudu a sos Entes locales. A su presente, a duos annos dae sas primas atividades ligadas a su Pnrr non bi nd’at àpidu unu chi siat unu assignadu dae sa Regione. No est possìbile a bi la sighire».

Ambos sos giornale (castiemus·nos·los), su primu in segunda pàgina e s’àteru a sa de tres, nos ammentant cales sunt sas missiones e sos finantziamentos rispetivos. Acò un’elencu lestru: digitalizatzione, innovatzione, cumpetitividade, cultura e turismu; transitzione ecològica; infrastruturas pro sa mobilidade sustenìbile; istrutzione e chirca; inclusione e coesione; sanidade.

“Bonas dies!” b’at de nàrrere (a propòsitu, bonas dies, deretu a iscrìere sena bos saludare...). Cun sos Comunes apretados in tempos de bandos e lassados sena personale e istrumentos a pustis. E bonas Dies de sa Sardigna, chi ocannu ant a èssere tres a sos trinta dae sa prima (fiat su 1993) e a unu dae sas eletziones noas. Sas polèmicas custu giru pertocant su dinare (mesu millione) partzidu in ses tzentros: Casteddu (260mìgia); Aristanis e Nùgoro (80); Tàtari (45); Barùmini (30); Bono (5).

Narat s’assessore Biancareddu chi «Sa Die devet torrare a èssere una festa de pòpulu. Sa ricurrèntzia un’oportunidade a tales chi sos mannos e sas generatziones noas» movant «dae su tempus coladu issoro pro sos disafios de s’Ìsula dae como in susu». E como unu diat pòdere nàrrere: e si sos disafios comintzarent pròpiu movende dae sos bisòngios de sas comunidades in intro de unu progetu natzionale, lassende·nche a banda mobilitatziones campanilìsticas e polèmicas eletoralìsticas? Forsis at a èssere tando sa Die.

Sos giornales terramannesos? Sa cara de Trump est bene posta a maduru in su bonu de s’imprenta itàlica; sas fainas suas e s’arrestu cun 34 imputatziones sunt ogetu de pàrrere comente su de Furio Colombo in Rebubblica («Su protzessu e sas incògnitas suas») e su de Lucia Annunziata in La Stampa («Democratzia americana, sa prus ora iscurigosa»). Ma su Pnrr est semper in cue, sena si nch’istesiare dae sas primas noas, mescamente a pustis de sa “dialètica” interna a sa majoria (gastare o mancu). Sos giornales de dereta si partzint sos temas: a un’ala La Verità cun sos vatzinos permanentes; Il Giornale («Atentu! Totus inoghe abarrant») e Libero («Allarme, in 400mìgia sunt lompende») cun sos migrantes. Domani nos contat de repressione cun su reatu nou contra a sos chi imbrutant sos monumentos (in intro de sa narratzione anti-ambientalista) chi «finas a como podiant èssere arrestados petzi in casu de acusa de dannu».

A cras.

m.p.