Sos giornales de oe #022

+ Nòminas – Nàschidas
20 Arbili 2023
sos giornales de oe

Bonas dies. Cun sa chida conca a sos concruos suos sos giornales de oe aberint ambos cun s’inchiesta noa de sas nòminas in Regione e cun sos indagados. Sos nùmenes (calicunu in prima) nche sunt totu cantos in intro de s’editzione. Comintzende dae su presidente de sa Giunta Christian Solinas. Cun pagos faeddos, sa chistione pertocat s’esistèntzia de unu sistema de pressione pro nominare sos cummissàrios inditados pro seletzionare sos ruolos dirigentziales. B’est traballende sa giustìtzia. A bìdere istemus ite nde essit a campu.

In intro de La Nuova Sardegna b’at un’àtera noa chi pertocat su presidente de sa Regione. A pustis de sas crìticas pro Sa Die de sa Sardigna de ocannu, acò s’assessore de sa Cultura Biancareddu chi narat de àere cumpartzidu ebbia su programma, ma chi custu l’at istèrridu Solinas.

Sa noa lèbia (a la lèghere) imbetzes la dat L’Unione sarda cun s’istòria de una famìlia ogiastrina cun mama de 28, babbu de 32 annos e chimbe pitzinnos, sa prus mannita de 11 annos. Noa “sul pezzo” ma in controtendèntzia sende chi si faeddat a s’ispissu de ispopulamentu (sa famìlia est de Osini) e de denatalidade.

E, difatis, custu est tema chi fintzas oe nch’est in intro de sos giornales italianos. «Rèdditu de ingraidèntzia», tìtulat Il Giornale. Est a nàrrere «peruna tassa pro chie faghet fìgios». Sa timòria de su càmbiu ètnicu paret a sa base de cale si siat sèberu polìticu e de cale si siat pàrrere editoriale de derete. Ma sigomente b’at semper calicunu chi la narat prus madura, acò a su diretore de La Verità chi narat: «Ma cale sostitutzione ètnica, semus a s’estintzione».

Serrende·la. Cantos semus sos cristianos in su mundu? Movende dae sos datos de s’Onu (8 milliardos e barda), L’Avvenire imprentat a maduru su tìtulu «Non semus in medas», annanghende chi su «cambiamentu climàticu non dipendet dae su nùmeru de sas persones».

 

© RIPRODUZIONE RISERVATA