Sos giornales de oe #025

«Semper prus artu su preju de sos macarrones, pratu prìntzipe de sos italianos. Prus chi non graes sos aumentos in Sardigna, +18% mancari sos ùrtimos 12 meses su costu de su trigu est minimadu de su 30%. “Sardos vìtimas de s’ispeculatzione”, s’acusa sos assòtzios de sos consumadores. S’arrennegu de sas famìlias custrintas a chircare sas ofertas».

Bonas dies, gasi aberit l’Unione sarda. La Nuova Sardegna, imbetzes, disinnat de dare su prus ispàtziu mannu a sas crònaca, a su naufràgiu deduas chidas a como in tretos marinos turritanos e a s’autopsia chi diat pàrrere abèrrere unu giallu e cun sas indàgines a càrrigu de su supèrstite. Indagadu fintzas s’amoradu de sa pitzoca chi s’est morta in Bosa.

Devimus torrare a s’Unione pro lèghere de sos mezos militares in Casteddu: «Una sirena de sa vetura de sos carabineris annùntziat sa colunna. Dae cue, pro unu momentu, non si podet colare: sa pretzedèntzia est pro su corteu militare mòvidu dae su Portu canale e conca a su polìgonu de Teulada». Cras comintzat su mega annestru bèllicu Noble Jump 2023 de sa Nato.

Cheret chi pensemus un’iscuta a cantu podet èssere bonu su trigu crèschidu in logos de gherra...

Sos giornales italianos a pustis de su 25 de abrile faghent unu resumu de sas manifestatziones de eris e de sas polèmicas de sas dies coladas in contu de antifascismu.