Vinitaly: reconnoschimentos pro 79 binos de Sardigna

Su resurtu prèmiat su traballu de unas cantas realidades produtivas
10 Arbili 2023
aprofundimentos

Aprofundimentu de su lunisSunt 79 sos binos sardos chi in sa de 55 editziones de su Vinitaly ant otentu unu reconnoschimentu in sa ghia "5 Star Wines -- the Book", est a nàrrere in s'issèberu de etichetas aprontadu dae sos de Veronafiere paris cun Assoenologi.

Faeddamus de unu resurtu importante pro ite prèmiat su traballu de unas cantas realidades produtivas chi bivent in su territòriu de Sardigna e chi cun sos produtos issoro lu valorizant.

Tocat a sutalineare ca sos binos produtos in Sardigna ant caraterìsticas dislindadas pro ite espressant bene sas caraterìsticas de s'ambiente in ue si faghent. Finas Christian Solinas, Presidente de sa Regione Autònoma de Sardigna, at sutalineadu su cuntentu suo pro sa resèssida otenta in Verona dae sas 72 cantinas sardas chi ant leadu parte a sa manifestatzione: "Semus orgolliosos pro sos resurtos otentos dae sa Sardigna in custa editzione de su Vinitaly". Solinas at peri pretzisadu ca "sa Sardigna si meresset totu s'atentzione chi in custu momentu est retzidende dae sos mercados europeos e extra-europeos  pro more de sos binos suos". Gosi a sos produtores sardos andat su prèmiu pro sa pelea e su traballu fatu.

Tra sos premiados b'at su Vermentino di Gallura DOCG, ma tocat peri a nàrrere ca est su Mandrolisai su binchidore mannu de custa editzione de su Vinitaly. Difatis in Verona sunt istados premiados 11 binos produtos in custa regione de Sardigna. Tra custos 7 etichetas sunt produsas dae unas cantas aziendas chi ant domo in Atzara. "Una resèssida manna" at sutalineadu su sìndigu de sa bidda de su Mandrolisai Alessandro Corona.

Est s"Azienda Famiglia Demelas" a àere otentu su reconnoschimentu prus importante pro su binu nieddu "Domo", chi batit a domo unu puntègiu de 95. Sighint sos 92 puntos de su binu Manodrolisai DOC 2021 e 90 de su Mandrolisai DOC 2020, ambos produtziones de sa cantina "La Dolce Vigna di Atzara". Puntègiu de 90 finas pro su Mandrolisai DOC 2020 de s'Azienda Vitivinicola Etzo, mentres otenet 92 puntos su Mandrolisai DOC 2021 de s'Azienda Fradiles Vitininicola. Sa Cantina Flore batit a domo unu puntègiu de 91 pro su Mandrolisai DOC Ruda 2020 e s'Azienda Roberto Cadeddu Vitivinicola lompet a 90 cun su Mandrolisai DOC Cresà 2021.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras