17 de maju, die internatzionale contra a s'omofobia, a sa bifobia e a sa transfobia

Aprofundimentu de su mèrcuris - Oe, 17 de maju, est sa die internatzionale contra a s'omofobia, a sa bifobia e a sa transfobia. Die marcada in calendàriu cunforma a sa risolutzione de su Parlamentu europeu de su 26 de abrile de su 2007.

«Semus bidende – leghimus in su situ istitutzionale de su Consìgiu europeu – a una crèschida de sa retòrica anti Lgbti, aproendada dae sa disinformatzione e dae sos contos farsos, chi a s’ispissu si fùrriat in violèntzia, angarias e marcu sotziale. Sas relatziones de s’Ilga (assòtziu internatzionale de lèsbicas, gajos, bisessuales, trans e intersessuales) e de sa Fra (agentzia de s’Ue pro sos diritos fundamentales) contant una crèschida de sos livellos de violèntzia, discriminatzione e esclusione contra a sas persones Lgbti in Europa. Custa situatzione peri su continente e peri su mundu oriolu mannu nos dat. Sas gherras, sas crisis e sas emergèntzias umanitàrias medas bortas agravant de prus sa vulnerabilidade de sa comunidade Lgbti».

Su ministru italianu de s’Istrutzione at imbiadu una lìtera invitende «sos dotzentes e sas iscolas de cada gradu, in intro de s’autonomia didàtica e organizativa issoro, a creare ocasiones de aprofundimentu cun sos istudiantes pro su chi pertocat sos temas ligados a sas discriminatziones, a su rispetu de sos diritos umanos e de sas libertades fundamentales».

Làstima chi in Itàlia sa lege previdet galu diritos diferentziados pro sas persones non eterosessuales. Làstima chi in Itàlia sas persones trans, in prus de àere diritos in mancu e in prus de sufrire unu tratamento che chi s’issoro siat una patologia, tenent dificultades prus mannas in contu de traballu. Làstima chi in Itàlia sos diritos de sas presones non eterosessuales siant ignorados (cando pròpiu ogetu de atacos dae derete e finamentas dae manca). Làstima chi non resessimus a cumprèndere chi diritos tziviles e sotziale devent andare a manu tenta.