Decretu Valditara, Biancareddu l'at a impugnare?

«Semus cara a unu decretu chi pro seguru penalizat sa Regione ca movet ebbia dae datos numèricos algèbricos. Non si podet fàghere sa riforma de s’iscola contende petzi sa populatzione e sos alunnos». Sunt sos faeddos de s’assessore regionale de sa Pùblica istrutzione Andrea Biancareddu contràriu a sos disinnos guvernativos de su ministru Valditara. «L’apo pedidu in manera formale – at annantu – de pigare in cunsideru sa morfologia de sa Sardigna, de sas dificultades de collegamentu e de su tassu de dispersione iscolàstica. Paret chi custa cosa no l’apant retzida, duncas b’est su tantu de impugnare su decretu, ca si faeddat de fatores perecuativos comente sa densidade demogràfica, sos collegamentos, sa presèntzia de ìsulas de minoria linguìstica».