Pitzocas migrantes, de 3 una retzit o bidet abusu sessuale

Aprofundimentu de su mèrcuris - De tres pitzocas migrantes in nord Àfrica, intre sas intervistadas, una at sufridu abusos sessuale o est testimòngia de abusos fatos a un’àtera.

Abusos sessuales o àteras formas de violèntzia de gènere cando sunt fuende·si·nche dae su paisu issoro de òrigine in cherta de unu mègius logu e de unu mègius benidore. Est custa cosa chi s’annanghet a cunflitos, a traballu chi non b’at, a sos cojuios a mala gana e a àteras chistiones chi cajonant disìgiu de fua.

Custu datu de 1/3 nos l’est intreghende s’organizatzione Save the children pro mèdiu de un’istùdiu (Girls on the Move in North Africa) fatu in pare cun su tzentru Samuel Hall.

Custa sa metodologia impreada: sos datos chi como connoschimus los ant regortos su 2022 intervistende a pitzinnas, pitzocas e fèminas giòvanas intre sos 9 e sos 24 annos, mescamente movende dae paisos de s’Àfrica sub-sahariana conca a sa Lìbia o, atraessende·la, conca a sa Tunisia, a su Marocu o a Itàlia e Ispagna.

In prus de sas violèntzias retzidas o bidas in su paisu de orìgine, custas pitzocas ponent in contu perìgulos in biàgiu e, pro custu, impreant unos cantos sistemas pro los minimare: bestende·si a mascru, movende in pare a fedales o a gente manna pro si difèndere mègius. E sos perìgulos in caminu non pertocant ebbia àteras violèntzias ma finamentas sa detentzione si custa gente est tenta dae sa Guàrdia costera lìbica. Custu cheret nàrrere chi sas pitzocas fuende·si·nche tenent bisòngiu de un’agiudu meda prus mannu, sende chi su chi retzint in domo issoro est capatze chi si repitat finamentas a pustis, furriende unu biàgiu de ispera in un’inferru continu.

Mèritu de custu istùdiu est su de ofèrrere una visione cumplessiva de s’esperièntzia feminile in totu sas latitùdines presentes in su biàgiu. Un’istùdiu pro nos fàghere cumprèndere galu mègius ite b’at in intro de chie lompet a inoghe.